DEPORTES

PIRAGÜISMO

CELEBROUSE A IX TAÇA IBÉRICA DE SLÁLOM 

Un bo balance para os Teixugos que se fixeron con doce medallas, cinco delas de ouro

Un participante en plena competición

Foto: Rosa Fernández Carrera

Rosa Fernández Carrera / Vila Nova de Cerveira

 A pasada fin de semana tivo lugar na Azenha de Pagade, na aldea de Covas, en Vilanova de Cerveira (Portugal),a IX Taça Ibérica de Slálom, proba coa que se abre a tempada 2018.  

 Esta competición, que vai gañando nivel ano a ano, foi organizada pola Federación Portuguesa de Piragüismo e polo Club Deportivo Miño Teixugos. A Taça, que está aberta a deportistas portugueses e españois, contou nesta ocasión cun total de 160 embarcacións de kaiak e canoa nas categorías infantil, cadete, júnior, sénior e veterano, que fixeron as súas espectaculares baixadas polas bravas augas do río Coura.  

 Na categoría absoluta ou sénior as primeiras posicións foron en K1 feminino para Laura Alonso, dos Teixugos; en K1 masculino para Iván Silva, do Águas Bravas Club de Amarante; en C1 feminino as participantes sénior quedaron fóra de finais, correspondendo o mellor tempo a júnior Ainhoa Lameiro, do Club Penedo, e en C1 masculino o gañador foi castelán David Burgos, do Club Río Eresma.  

 O Club Deportivo Miño participou con vinte embarcacións, das cales pasaron a finais quince, cuns moi bos resultados. 

 En K1 Infantil, Sergio Martínez foi o gañador; Samuel Castro rematou segundo e Alexis Segadaes terceiro. 

 En K1 júnior Marco Patiño rematou duodécimo a causa dunha indisposición, que non lle permitiu facer a baixada de finais. 

 En K1 sénior Brais Castro, foi undécimo, e Emilio Rodríguez décimo cuarto.  

 En K1 Infantil feminino Ainhoa Barreiro foi a gañadora, e Alba Soutelo foi segunda. 

 En K1 cadete Ariadna Pereira rematou segunda. E en K1 sénior Laura Alonso gañou a proba, e Marina Ruedas rematou terceira.  

 En C1 sénior Brais Castro obtivo terceira posición, e Samuel Castro foi primeiro en C1 Infantil. 

 En C1 feminino infantil Alba Soutelo foi primeira, e Ainhoa Barreiro, segunda.  

 Un bo balance para os Teixugos que se fixeron con doce medallas, cinco delas de ouro.  

 Na clasificación final por equipos gañou o Piragüismo Penedo, de Caldelas, seguido polo Águas Bravas Club de Amarante, terceiro o Club Tea de Mondariz, e Miño-Teixugos rematou na cuarta posición.  

 GALERÍA DE IMAXES