COMITÉ DE EMPRESA DA AUTORIDADE PORTUARIA DE VIGO
O comité de empresa da Autoridade Portuaria de Vigo mostra o seu total apoio aos compañeiros involucrados na Operación Govi. En canto á información publicada nos medios, queremos aclarar que en canto aos 18 policías portuarios que están a ser investigados pola suposta comisión dun delito continuado de falsidade documental, a Autoridade Portuaria de Vigo ten que asumir a responsabilidade dunha vez por todas e eximir os seus traballadores, pois o suposto delito que lles é atribuído pola Garda Civil vén motivado por un erro nun procedemento interno de calidade (Concretamente o “PC-01 explotación da lonxa”) e un defecto de forma nun dos seus documentos.
Tanto é así que o pasado 16 de novembro o propio Enrique C. López Veiga entregaba un comunicado ao comité de empresa no que asumía que o citado procedemento non se adecuaba á realidade e xa con data de 15 de novembro, deixábase de cubrir, por toda a policía portuaria, o documento relacionado. Tendo en conta que a Policía Portuaria realiza o seu traballo tal e como lle vén encomendado desde a dirección da empresa e que a máxima responsabilidade dos modelos e manuais de calidade recae tamén nos máximos responsables da empresa pública, o comité de empresa considera que está en mans do organismo o eximir aos seus traballadores, que se viron danados moral, social e economicamente polo mero feito de realizar o seu traballo. Neste momento todos os procedementos están en situación de “standby” e o propio comité de empresa solicitou á Autoridade Portuaria a contratación dunha consultora para a revisión e corrección de todos os procedementos que impliquen certificación algunha por parte da Policía Portuaria.
Doutra banda lamentamos que se lle queira atribuír á Policía Portuaria un deixamento de funcións en varios ámbitos nos que non teñen competencias, por exemplo o control e inspección pesqueira, que dependendo do caladoiro e tipo de pesca recaerían na Consellería do Mar ou no M.A. P.A. M.A, polo que o comité de empresa considera que é un bo momento para que se definan dunha vez por todas e con claridade as funcións da Policía Portuaria, que en numerosas ocasións ten que asumir tarefas que lles son encomendadas polos seus superiores e que non figuran entre as súas competencias (cabe lembrar que a falta dun regulamento estatal de Policía Portuaria). Advírtese tamén desde o comité de empresa que toda función ou competencia que se lle atribúa á Policía Portuaria ten que vir acompañada por unha formación e adecuación a procedementos e normas internas, que en moitas ocasións non son trasladas a un servizo de Policía, que ten que ir adecuándose sobre a marcha.
O colectivo de Policía Portuaria atópase moi molesto co organismo público ante a indefensión e a falta de apoio mostrada pola Autoridade Portuaria e senten moi doídos polo feito de que se veu resaltando a inestimable colaboración da Autoridade Portuaria neste asunto e que, con todo, en ningún momento o máximo responsable da mesma tentase poñer freo a unha situación tan gravosa e prexudicial para un colectivo que do único que é culpable é da realización do seu traballo da maneira máis profesional posible. Tense prevista unha reunión entre o comité de empresa, a dirección da Autoridade Portuaria e os artífices dos procedementos de Calidade para a próxima semana e posteriormente convocarase unha asemblea informativa na que se adoptarán as medidas oportunas.
Diego González Domínguez
Presidente comité de empresa
Autoridade Portuaria de Vigo
(R.)
Ningún comentario:
Publicar un comentario