A GUARDA

Os «ruteiros» de Petiscos con arte recolleron o seu agasallo no Concello  

O alcalde Antonio Lomba Baz, co xerente de Adega Gran Novás e os cinco "ruteiros" premiados

Foto: C.A.G.

Infogauda / A Guarda

 Os cinco gañadores do sorteo da Ruta Petiscos con Arte recolleron esta mañá os lotes de viño albariño Gran Novás da man do alcalde do Concello da Guarda, Antonio Lomba, e o xerente da Adega Gran Novás, Arturo Conde.  

 Segundo indican desde o executivo municipal "os rosaleiros Carmen María Martínez e Ricardo Martínez; o tudense Víctor Manuel González Souto (Tui); e os guardeses Eva Martínez Trigo e Daniel Baz Vicente, resultaron ser os premiados entre as máis de 1.400 persoas participantes no sorteo da ruta, para cuxa participación debían entregar o boleto cuberto cos seus datos tras a cata dun dos petisco".   

 Preto dun 60% das persoas participantes no sorteo son veciños e veciñas da Guarda, namentres a porcentaxe restante complétase principalmente con persoas procedentes da comarca (Tui, O Rosal e Oia) e localidades como Vigo, Salvaterra e Marín, ademais doutros visitantes procedentes de Ourense ou Madrid.  

 O rexedor local aproveitou o acto de entrega dos lotes para agradecer o apoio prestado nesta primeira edición da ruta tanto polos establecementos como polos artistas, así como polas persoas participantes en calidade de ruteiros e ruteiras. 

 Arturo Conde, xerente da Adega Gran Novás, presente no acto, tamén recibiu o agradecemento por parte dos organizadores, pola súa colaboración nesta iniciativa coa cesión dos 5 lotes de viño.   

 Dada a boa acollida da iniciativa, ámbolos dous representantes incidiron na vontade de repetir anualmente o evento gastronómica, contribuíndo á promoción da tradición culinaria e os artistas da Guarda e a súa contorna.