A GUARDA

Ignacia Cadilla, «a avoa da Guarda», cumpre 108 anos 

Con boa saúde e rodeada da súa familia 

Ignacia Cadilla - no centro da imaxe - recibiu con sorpresa aos representantes municipais 

Fotos: C.A.G.

  

Infogauda / A Guarda

 O  alcalde do Concello da Guarda, Antonio Lomba Baz, e as concelleiras María Teresa Vicente Baz e Elena Baz Rodríguez, visitaron onte á «avoa da Guarda», Ignacia Cadilla, no día do seu 108 aniversario.  

O rexedor e as concelleiras loaron a súa boa forma e humor, e desexaron poder volver visitala para darlle os parabéns nos próximos anos

 Ignacia recibiu con sorpresa aos representantes municipais e agradeceu en repetidas ocasións a súa visita. «Que Deus vos de saúde, a min xa ma deu», desexou a anciá, á que agasallaron cun ramo de flores, unha tarta e unha placa conmemorativa que da conta do 108 aniversario da que xa é a persoa máis lonxeva do municipio guardés.   

 Segundo explicaron as súas fillas Charo e Marina, Ignacia goza de boa saúde e mesmo xoga as cartas. «Eu levo a conta cos dedos, pero ela leva todo de cabeza» relata a súa sobriña Concepción, compañeira de partidas.   

 Aínda que xa non pode saír á rúa, Ignacia acostuma a aproximarse á ventá que dá ao camiño de Hernán Cortés para ver pasar aos veciños e veciñas; «como unha lagarta», engade Ignacia con sorna.   

 O rexedor e as concelleiras loaron a súa boa forma e humor, e desexaron poder volver visitala para darlle os parabéns nos próximos anos.