PONTEVEDRA

Carmela Silva recolle en Madrid o Q de Calidade outorgado ás oficinas de Turismo Rías Baixas 

A oficina do palacete das Mendoza e a do mosteiro da Armenteira foron as primeiras de Galicia en obter o distintivo Q de Calidade  

A presidenta da Deputación de Pontevedra, Carmela Silva, acompañada polos deputados e deputadas de Turismo, Cooperación, Emprego e Mobilidade, recolleu na Galería de Cristal do Palacio de Cibeles de Madrid os distintivos Q outorgados polo Instituto para a Calidade Turística Española

Foto: D. P.

Infogauda / Pontevedra

 A presidenta da Deputación de Pontevedra, Carmela Silva, acompañada polos deputados e deputadas de Turismo, Cooperación, Emprego e Mobilidade, recolleu na Galería de Cristal do Palacio de Cibeles de Madrid os distintivos Q outorgados polo Instituto para a Calidade Turística Española ás oficinas do palacete das Mendoza e do mosteiro da Armenteira. A distinción, tal e como asegurou a presidenta provincial, "supón un recoñecemento á calidade dos servizos prestados por Turismo Rías Baixas, xa que valora o esforzo pola promoción da participación activa das usuarias e usuarios na mellora do punto, pola maior confianza na profesionalidade e formación do persoal e o impulso da mellora da xestión da oficina".  

 Os puntos de información de Turismo Rías Baixas son as primeiras oficinas turísticas de Galicia que obtiveron o Q de Calidade Turística. Para acadalo superaron unha estrita auditoría que valorou a calidade das instalacións, o servizo de atención e de acollida ao turista e a continua mellora dos medios técnicos e humanos.  

 A provincia de Pontevedra conta con 115 establecementos co Q de Calidade Turística, que representan o 40 % dos establecementos de Galicia, que ten 284 entidades certificadas. Ao respecto, Carmela Silva manifestou a súa satisfacción "pola excelencia da nosa provincia e polo esforzo que entidades e empresas están a realizar en materia de calidade, que está a repercutir de forma tan positiva no sector turístico, tan importante para a economía das Rías Baixas".