O DOG publica a posta en marcha da tarxeta “Xente Nova” e os interesados poderán obter a información necesaria na web tmgxentenova.xunta.gal
Xa se pode solicitar cita para conseguir a tarxeta "Xente Nova” e beneficiarse do transporte metropolitano gratis para menores de 19 anos desde este mesmo luns
Os rapaces poderán realizar de forma gratuíta os desprazamentos interurbanos nas distintas áreas do Plan de Transporte Metropolitano de Galicia
A Xunta de Galicia espera que os concellos das principais cidades respondan á petición do Parlamento galego e apliquen a mesma medida para os desprazamentos en autobús urbano, polo que tamén serían gratuítos para a mocidade
Os beneficiarios terán un medio de pago específico, a TMG Xente Nova, tarxeta metropolitana que será expedida gratuitamente por ABANCA
Infogauda / Santiago
A Xunta de Galicia, a través da Consellería de Infraestruturas e Vivenda, activa dende hoxe o servizo de cita previa para obter a tarxeta “Xente Nova” que permitirá a gratuidade do transporte metropolitano para menores de 19 anos. Así, o Diario Oficial de Galicia (DOG) publica a posta en marcha deste novo servizo e os interesados poderán solicitalo nesta web, onde se ofrecerá cumprida información da operativa da Tarifa Xente Nova.
Para a operativa desta tarifa establécese un medio de pagamento específico, a TMG Xente Nova, tarxeta metropolitana que será expedida gratuitamente por ABANCA, entidade colaboradora no Plan de Transporte Metropolitano de Galicia. O proxecto está aberto a colaboración por parte doutras entidades financeiras que así o promovan. Grazas a esta plataforma evitaranse colas nas oficinas desta entidade e optimizarase a eficiencia deste servizo.
O programa “Xente Nova” supón a implantación dunha nova tarifa que vai dirixida ás persoas con idades comprendidas entre os 4 e os 18 anos de idade, incluídos, -tendo en conta que os menores de 4 anos xa viaxan de balde nos autobuses metropolitanos-, que será de cero euros nas viaxes de carácter interurbano realizadas dentro do Plan de Transporte Metropolitano de Galicia, cun número máximo de sesenta (60) viaxes mensuais por usuario.
Tamén será gratuíto o transbordo que se realice entre servizos interurbanos e urbanos, ou viceversa, cando forme parte dunha viaxe metropolitana. Ademais, na medida en que os concellos das principais cidades, que posúen transporte urbano propio, sigan a petición que lles formulou o Parlamento de Galicia o pasado 28 de xuño, a medida poderá estenderse tamén ao transporte urbano.
Carácter social do PTM de Galicia
Con esta medida, o Goberno galego reforza o carácter social do Plan de Transporte Metropolitano (PTM) de Galicia, posibilitando que os rapaces menores de 19 anos realicen de forma gratuíta os desprazamentos interurbanos nas distintas áreas do PTM de Galicia.
O obxectivo da iniciativa é facilitar o acceso da mocidade aos servizos básicos como a sanidade ou a educación, fomentando o emprego do transporte público, formando ás novas xeracións no seu uso, ao tempo que se axuda de forma substancial ás economías familiares.
Así, unha persoa titular da TMG Xente Nova que realice habitualmente percorridos definidos como “un salto” no sistema tarifario zonal do Plan, por exemplo entre Redondela e Vigo ou entre Narón e Ferrol, poderá aforrar 520 euros anuais adicionais, e unha que viaxe habitualmente entre Betanzos e A Coruña ou entre Baleira e Lugo, poderá aforrar 800 euros anuais, ao tratarse de percorridos que supoñen “dous saltos” no sistema zonal. Nos percorridos de “tres saltos” como entre A Estrada e Santiago, o aforro adicional pode acadar máis de 1.120 euros anuais.
Mediante a utilización da TMG Xente Nova, as persoas titulares delas aboarán con cargo á súa tarxeta os desprazamentos que realice en calquera dos servizos de transporte público integrados nas Áreas de Transporte Metropolitano de Galicia implantadas. Sen prexuízo da posibilidade de utilización da TMG Xente Nova para o pagamento dun maior número de viaxes, a tarifa Xente Nova dará dereito ao reintegro do 100% do importe das viaxes metropolitanas interurbanas, ata un máximo de 60 viaxes mensuais.
Para tal fin, a Xunta de Galicia procesará quincenalmente os datos das viaxes pagadas con TMG Xente Nova para calcular os datos dos reintegros que deben operar respecto de cada tarxeta, que se porán a disposición das persoas usuarias os días 5 e 20 de cada mes nos caixeiros de ABANCA. Así, os consumos realizados entre o 1 e o 15 de setembro estarán a disposición das persoas usuarias a partir do 5 de outubro, e os realizados entre o 16 e o 30 de setembro, o estarán a partir do 20 de outubro.
Dende a data na que este se pon á súa disposición, as persoas usuarias disporán de dous meses para aceptar este reintegro nos caixeiros, mediante unha operación sinxela e intuitiva, e poderán consultar en calquera momento o estado das súas recargas nesta páxina web.
Adicionalmente, como medida de promoción da utilización desta tarifa e do medio de pagamento asociado, e coa finalidade de facilitar aos seus titulares a utilización gratuíta do transporte xa dende o mesmo momento inicial, as primeiras 50.000 TMG Xente Nova serán entregadas cunha recarga inicial de vinte euros, que asume xa a Xunta de Galicia.
Logo da publicación de hoxe no DOG da Orde da Xunta, a partir do luns 29 de agosto a tarifa será plenamente operativa para todas aquelas persoas usuarias que vaian obtendo as súas TMG Xente Nova.
Documentos relacionados
Ningún comentario:
Publicar un comentario