PATRIMONIO

Umha chamada de atençom relativamente aos fortes de campanha: o exemplo dos redutos dos Pirenéus Ocidentais

Reduto de Mouiz ou Koralhandia

JOSÉ BUIZA BADAS

 Nestes âmbitos fronteiriços, onde conferimos verdadeiros palimpsestos ou sobreposiçons de todo o tipo (linguísticos, políticos, cronológicos,...)  e atendendo a conteúdos relativos a Património Militar, som dignos de nota uns enclaves feitos com escassez de meios e talvez apressadamente perante a ameaça dumha invasom terrestre do inimigo. No contexto de dous eventos históricos, a Revoluçom francesa e a libertaçom da Península de tropas napoleónicas, ou seja, campanhas de 1793-1795 e a de 1813, conseguimos desvendar ocorrências que se prendem do facto de defender umha determinada comarca fronteiriça (Urrugne, Ascain, Sare, etc.) da Coligaçom britânica-hispano-lusa. Importa assim  referir da nossa parte aspectos ligados à arquitectura militar, sobejamente analisados por autores como Guy Lalanne ou Francis Gaudeul, de entre outros.

                                                  Mapa de Sare

 Conhecemos de obras em torrom (terra, areia, croios, água ou paliçadas) cá, no Minho. Sabemos pola FORTRANS da existência destes sítios, resgatados pola boa vontade duns poucos. Neste momento estám “deixados ao Deus dará”, por muito que se insista na ideia de colocá-los  no mapa. A diferença com França e que alí já som considerados legalmente Monumentos Históricos (MH), que treze deles passarom a tal categoria e que somam ao total mais de umha vintena de redutos. Uns privados e outros nom, exprimem a possibilidade certa de construir cintos de defesa de comarcas passíveis de serem invadidas e a validez militar dos materiais empregues e das planimetrias utilizadas. Nomes como Bayonnette, Émigrés, Ihizelaia, Mouiz ou Koralhandia, Esnaur, Bizkarzun, Olhain, Mendibidea, Zuhalmendi, Chelkor, Sainte Barbe,…, acrescentam um número de fortes, torres, baterias, fortalezas que vai definir como único este espaço, verdadeira Fortrans Pirenaica Ocidental.

 Quis dar a minha aportaçom ás mediçons dalguns destes enclaves aquando estiven de passagem por centros de reconhecimento da  Association Vauban (Fort du Portalet e Navarrenx). O resultado é o que se segue: Em Urrunha- Urrugne o reduto da Bayonnette tem um perímetro real de 318 m. a nível de escarpa e umha área de 3.584 m2, constituindo um polígono externo generalista em octógono irregular de 292 m. de  comprimento. A distância máxima entre pontas extremas é de 97 metros. Implantado no meio da “muga”, corresponde a território navarro umha superfície de 1.708 m2, criando umha polémica baseada no marco de fronteira nº 9. As suas linearidades de recuperaçom ajudarom-me a estabelecer o antes citado polígono externo, dado o desgaste lógico dos perfis.

 Um outro exemplo, o reduto des Émigrés, oferece um polígono externo pentagonal de 315 m. e 6.386 m2 de superfície, tendo um perímetro real de 325 m. e umha área de 3.298 m2. Os seus fossos tenhem larguras de até 6 metros entre escarpas e contraescarpas. As larguras do recinto interior respondem a medidas de 50 m., até 80 m. . Este espaço está  bem terraplanado e composto de um rectângulo e 3 bastions com angulaçons de 60-62º graus o bastiom Suroeste, 68-70º graus o bastiom Sul e 77º graus o bastióm Suleste. Os desníveis som formados polas escarpas propositadas e polos parapeitos de pedras empilhadas nas faces oeste, leste e sul. Cabe a hipótese de tracejar um eixo de simetrizaçom de 86 metros para a planta.

Reduto de Sainte Barbe

 Ao norte da vila de Sare temos o Reduto de Zuhalmendi, com perímetro real de 308 metros e área de 2.845 m2,  tem um polígono externo em  hexágono irregular oferecendo a possibilidade de se lhe aplicar um eixo de simetrizaçom de 80 metros. Regista umha distância máxima entre baluartes de 107 m.. Os fossos dam larguras de entre 3,20 m. e 4,40 m.. Enfim, ao Sul desta vila de Sare, encontra-se o Reduto de Sainte Barbe. Com perímetro real de 240 m. e superfície de 1.650 m2, oferece em planta um polígono externo radical em hexágono irregular que, apurando as cousas,  dá a ideia dumha sobreposiçom de dous triângulos, um isósceles e o outro escaleno. O resultado à vista é umha planta estrelada. Tem um comprimento máximo entre pontas de 76 metros. Na realidade, poder-se-ia dizer que a superposiçom de triângulos de 175 m. de comprimento e 192 m. determina todo o resto deste espaço, dando conta ademais das suas angulaçons: 50º graus  no norte; 67-68º graus no noreste; 55º graus no suleste;  67º graus no sul e 66-67º no suroeste.

 Sem embargo, o mais conhecido e reconhecido e o Reduto de Mouiz ou Koralhandia, nom merecendo a pena acrescentar quaisquer dados sobre ele. Somente sublinhar que  ultimamente há queixas sobre pilhagens, roubo de lousas empilhadas, desaparecidas a modo  de “souvenirs”. Obviamente, estas práticas estám punidas logo após serem alguns destes redutos nomeados como Monumento Histórico (MH).