A GUARDA

Continúa aberto ata o 19 de agosto o prazo para inscribirse no curso de funky da Guarda, dentro do programa Depo RúARTE  

Infogauda / A Guarda

 Tras a boa acollida do primeiro curso celebrado na Guarda dentro do programa Depo RúARTE da Deputación de Pontevedra, un curso de graffiti que remata hoxe luns día 8 de agosto, ofrecerase na localidade un segundo curso, esta vez de temática funky.  

 Este curso terá lugar entre os días 29 de agosto e 9 de setembro, de luns a venres de 10:30 a 13:00 horas, no Ximnasio Municipal da Guarda. 

 O obxectivo desta iniciativa é que os participantes podan adquirir coñecementos, habilidades e destrezas básicas sobre funky, coñecer o procedemento do funky e os estilos que o compoñen, adquirir coñecementos básicos sobre composición  e enfocar o funky como arte urbana e como actividade física deportiva saudable.   

 O curso vai dirixido a rapaces e rapazas de 14 a 30 anos empadroados no Concello da Guarda. Conta con prazas limitadas, polo que a orde para cubrir as prazas será a seguinte: 

- Primeiro aqueles comprendidos entre os 14 e 30 empadroados na Guarda. 

- Se quedan prazas libres, tamén poderán inscribirse persoas non empadroadas na vila que cumpran o requisito da idade. - Por último poderán inscribirse os empadroados que non teñan entre 14 e 30 anos.  

 O prazo para inscribirse estará aberto ata o venres día 19 de agosto e poderán facelo no Rexistro do Concello da Guarda de 8:00 a 14:00 horas, de luns a venres. Para isto deben achegar un formulario de solicitude, que poden descargar na web da Deputación de Pontevedra; unha fotocopia do DNI e o empadroamento.  

 Dende o concello volve a apostarse por ofrecer á xuventude guardesa unha variada e novidosa oferta de actividades culturais e de lecer para facer deste un verán inesquecible e cheo de enriquecedoras experiencias para os mozos e mozas da Guarda.