A GUARDA

CULTURA

“De Luis Bello a Alonso Ríos, viaxe polas escolas de Galicia”, será o tema que abordará o profesor Xosé Manuel Malheiro na vindeira Barferencia de Inverno

A cita é este venres, 15 de xaneiro, no bar Tecla´s. 

Infogauda / A Guarda

 Tal e como estaba provisto, neste ano 2016 continúan as Barferencias de Inverno organizadas polo Concello da Guarda en colaboración coa Asociación Naturalista "Baixo Miño" (ANABAM).

 A próxima cita é este venres, día 15 de xaneiro, ás 20,30 horas no bar Tecla´s. A ponencia, que leva por nome “De Luis Bello a Alonso Ríos, viaxe polas escolas de Galicia” estará presentada por Xosé Manuel Malheiro Gutiérrez, Mestre e Doutor en Filosofía e Ciencias da Educación (Pedagoxía), pola Universidade de Santiago de Compostela (USC) e desde 2008, profesor na Facultade da Educación da Universidade da Coruña (UDC), onde dirixe o Departamento de Pedagoxía e Didáctica, e integra o Grupo de investigación ‘Esculca’ (Escola e Cultura).

 Malheiro Gutiérrez é autor, entre outras, das seguintes obras: 

- A Escola da Bandeira. Unha nova escola en Galicia (1909-1936), 2000. 

- Fomento de la Instrucción Gallega, 2002 (coord.). 

- A Herdanza da emigración ultramarina, 2004. 

- Os lalinenses en América. Proxectos educativos e organización escolar. 2005. 

- As escolas de emigrantes e o Pensamento Pedagóxico: Ignacio Ares de Parga e Antón Alonso Ríos, 2006. 

- Nicolás Gutiérrez Campo. O recordo dun bo mestre, dun home bo, 2007.

 A charla, tal e como confirma o propio Xosé Manuel Malheiro, “vai a xirar en torno á emigración galega e á pegada que esa emigración deixou en Galicia no que respecta ás influencias educativas importadas desde América” .

 O Concello de A Guarda convida a todos os veciños da localidade a participar nesta actividade.

Próximas datas

 Tras esta cita xa só quedan dúas máis Barferencias de Inverno programadas. A primeira delas será o próximo venres, 29 de xaneiro, no Bar Bergantín. Nesta ocasión Roberto Rodríguez Álvarez falará da “Talasonimia da costa da Guarda”.

 A última charla é o venres 26 de febreiro no Bar Aquilino. “15 pesetas por frete” da man de Fani Alonso Tamayo, que pechará as Barferencias de Inverno.

Ambas ponencias serán ás 20,30 horas.