O ROSAL

O BNG denuncia neglixencia, abandono de funcións e falta de respecto por parte do PP aos acordos plenarios 

O Alcalde “esquécese” de executar un acordo onde se solicitaba  transporte público para a mocidade do Rosal que estuda bacharelato e ciclos no concello de A Guarda.  

Alberte Alonso Pereira 

Voceiro do BNG no Rosal

Infogauda / O Rosal

 O BNG do Rosal ven de denunciar o que considera unha neglixencia, abandono de funcións e falta de respecto polos acordos plenarios, que pon de manifesto a falta de sensibilidade ante os problemas dos veciños. 

 Os nacionalistas argumentan que no pleno do 26 de setembro, solicitaron transporte público para a mocidade do Rosal que estuda bacharelato e ciclos no concello de A Guarda. A proposta foi aprobada por unanimidade. Din que dous meses despois, no pleno do pasado sábado, o alcalde manifestou non ter feito ningunha xestión para cumprir o acordado, porque o tiña esquecido.    

 Ao remate de cada curso, uns 40 mozos e mozas do Rosal rematan os seus estudos de secundaria obrigatoria e deben desprazarse a outros municipios para continuar coa súa formación. A opción máis escollida é estudar o bacharelato ou un ciclo formativo na Guarda. Porén, os horarios do transporte público non concordan co horario do instituto, polo que a súa única opción é o transporte privado.  

 O BNG denunciou esta neglixencia no pasado pleno e mostrou o seu estupor pola  falta de sensibilidade ante os problemas dos veciños.