A GUARDA

FIN DE SEMANA REPLETO DE ACTIVIDADES NA VILA GUARDESA

Na imaxe unha das presentacións do "Espada en Tapas", que se poderá degustar en vinte establecementos de A Guarda 

Foto: C.A.G.

Infogauda / A Guarda

 Esta fin de semana son moitas e moi variadas as actividades que están programadas para os veciños e veciñas de A Guarda.

Así, dende hoxe venres día 18 e ata o domingo 20, diferentes establecementos da localidade ofertarán dentro da iniciativa “Espada en Tapas”, organizada por ORPAGU, o Concello de A Guarda e os locais adheridos, unha tapa de peixe espada gratuíta coas súas consumicións. Esta ruta gastronómica estará acompañada dunha ruta musical.

 Os establecementos que forman parte desta ruta son: Aparthotel Marouco, Brisamar, Carla, Jamonería Anabel, Pizzicata, Os Remos, O Cangrexal, Marusía, Gaviota, Trasmallo e Xeito.

 Ademais, nas rúas onde están estes locais haberá música en directo. Os grupos “Deixandar” e “Lirolai” pasearán a carón dos restaurantes adheridos para amenizar ós consumidores.

 Entre os participantes nesta ruta, que continuará durante a fin de semana próximo (días 25, 26 e 27), ORPAGU sortea un lote de produtos de peixe espada.

Música, charlas e mercadillo

 Hoxe venres, as Xuventudes Socialistas da Guarda, presenten o “Ciclo LGTBI: Queda moito por facer”. Esta primeira charla, que comezará ás 20 horas no Centro Cultural, contará con tres ponentes: Estela Fernández, experta en igualdade, Xabier Constela, membro do colectivo de pais e nais de menores transexuais e Fito Ferreiro, coordinador federal do Colectivo 7 Cores.

 O acto está aberto a todos os públicos e o tema a tratar é “Como observamos a transexualidade nos menores?”.

 O sábado, no barrio da Gándara, a Organización de Grupo de Gaitas A Boalleira, organiza un “Serán”. A cita é ás 21 horas na Praza dos Seixiños.

 Por último, a fin de semana remata cun mercadillo solidario organizado por “ConRazones”. Durante toda a xornada do domingo, tanto pola mañá como pola tarde, a Alameda da Guarda acollerá decenas de postos solidarios.