A GUARDA

RECANTO DA ARTE

DELIA RODRÍGUEZ VILAVEDRA

"BINOMIO E PERCORRIDO"

Exposición de Artes Plásticas

Do 11 o 27 de xullo de 2014, no Centro Cultural e Social de A Guarda

  Delia Rodríguez Vilavedra

Ricardo Rodríguez Vicente / A Guarda

    Chámase Delia Rodríguez Vilavedra, aínda que como nome artístico acostuma asinar súas obras como Delia R.Vilavedra. É natural de A Guarda.

   Está licenciada en Belas Artes pola Facultade de Belas Artes de Pontevedra, ainda que leva formándose en arte dende ben pequena, xa que súa procura dun camiño profisional nas artes plásticas é unha cuestión vocacional dende súa nenez.

    As disciplinas artísticas nas que máis traballa son pintura e debuxo / ilustración, aínda que non se pón barreiras á hora de crear e, por iso, considérase unha artista multidisclipinar.

   Estilísticamente define súa obra como “expresionismo surrealista que oscila entre a figuración e a abstracción”. En moitas das súas pezas incorpora materiais á superficie pictórica como tecidos, arames, redes,...

   Non se pecha a novos estilos e formas de expresión, porque está en constante mudanza e evolución.

   Súa obra – segundo ela mesma dí – “reflicte unha acumulación de sensacións, emocións e experiencias do mundo que me rodea e transfórmame de xeito constante. Introdúcese na parte máis profunda da miña psique e volta saír ao exterior transformado en cor, forma e materia.

   No tocante ao seu significado, gústame que sexa parte da interacción co público o que lle outorgue un significado pleno e persoal. Para mín cada unha delas é un pedaciño do meu interior, dos meus sentimentos e experiencias, e complétanse cando transmiten diferentes emocións ao espectador ou espectadora”.

   Ten realizado numerosas exposicións, tanto individuais como colectivas, por Galicia especialmente, mais tamén por outros lugares do territorio español. 

     Desde o día 11 ao 27 de xullo, expón no Centro Cultural de A Guarda. A mostra que Delia R. Vilavedra presenta no Centro Cultural de A Guarda,  pode visitarse nos seguintes horarios:

   De luns á venres: de 09:00 á 14:00 h. e de 19:00 á 21:00 h.

   Con Delia R. Vilavedra, vimos de manter á seguinte entrevista: 

Que supón para Delia R.Vilavedra voltar á expór na súa vila natal?

- Resulta interesante, e como un “voltar a casa”. Ademais é a primeira vez que teño a oportunidade de realizar unha mostra individual nunha sala de exposicións como tal, aquí, na Guarda. E teño a sorte de contar con un espazo que me permite amosar un grande número de obras, algo que non adoita ser habitual polos formatos que traballo, e así poder facer unha revisión dos últimos anos, do traballo realizado e do camiño percorrido.

 Cómo definiría á obra que presenta estes días na exposición “Binomio e Percorrido”?

 - A palabra máis axeitada sería heteroxénea, pois e unha selección de obras realizadas dende o 2009 ata a actualidade.

  Percorridos a través de paisaxes, corpo e identidade e a través tamén dos anos.

  Percorridos por obras nas que domina o binomio, a dicotomía: entre o real e o onírico, entre o espazo surreal-poético-superficie e o marco real que oprime, racha e fura con obxectos que se enxertan no soño, dentro e fóra.

                Delia R. Vilavedra traballando ao aire libre

  

Cal é á reflexión global da súa serie “Non hai mal que por ben non veña” e a quen vai dirixida súa mensaxe?

  - Como adoita acontecer coa maioría das obras que realizo, son pezas moi persoais, feitas de xeito moi instintivo, “coas tripas máis que coa cabeza”, como adoita dicirse. Esta e unha serie de fai xa sete anos, que non está incluida na exposición, máis xunto coa serie “Mundos após da névoa” que sí está presente, creo que son, ata o día de hoxe  as realizadas máis a “corazón aberto”. Non van dirixidas a nadie en concreto porque son unha expresión moi íntima, non pretendo con elas tratar de enviar unha mensaxe, non foron creadas con ese fin, son pequenas partes de mín que se amosan ao exterior como una disección do que acontece pola miña cabeza e polo meu sentir.

Ata que punto inflúe na súa obra o día a día persoal?

  - O inflúe todo. Cando traballo expulso todas as vivencias, todos os sentimentos convertidos en cores e formas. Son incapaz de conterme ainda que queira facelo, porque se convirte nunha necesidade. 

                     Vista  parcial da exposición "Binomio e Percorrido"

Hai algúns motivos – longas cabeleiras que semellan apreixar  anatomías e ollos  doentes - que aparecen de xeito recurrente en varias obras súas. Que desexa á autora transmitirlle o espectador?

  - Gosto muito de traballar con elementos do corpo como significantes da identidade.

  No caso do cabelo, gustame muito a súa textura e plasticidade como elemento anatómico do debuxo. Igual que nas pinturas emprego fios e lás e ambos son na maioría dos casos, representativos de, entre outras cousas, a dicotomía do propio e o alleo, entre o real e o surreal, xa que e unha parte do corpo que, aínda pertencéndonos, non somos quen de controlar, como ben podemos facer con músculos ou articulacións, e cando o corpo é apreixado polos cabelos evoca ata que punto podemos apreixarnos por nos mesmas.

  En canto aos ollos, esa é unha cuestión de experiencias e vivencias persoais que saen reflectidas, as veces de xeito inconsciente, nas miñas obras, igual que Frida Khalo amosaba a súa columna vertebral,  eu amoso esta parte tan importante para min.

  

                  A exposición "Binomio e Percorrido" desde outro ángulo

Falando de anatomías, observamos que na obra de Delia R.Vilavedra, á figura feminina está moi presente, máis en todo caso, exenta de calquer connotación sexista. Trátase de un posicionamento persoal?

  - Si, é un posicionamente persoal e consciente. Traballo con anatomías femeninas dende unha perspectiva persoal de muller creadora, co corpo como suxeito representado e representante de formas, ideas e psiques, non coma un obxecto de contemplación, sexualizado nun ente “desexable” como tan a miúdo acostumamos a observar ao longo da historia da arte, dende unha perspectiva de home creador - observador deleitado.

 En qué proxectos creativos está inmersa Delia R.Vilavedra hoxendía?

  - Ademais das exposicións individuais e colectivas que teño realizado ao longo deste ano e algunhas que ainda están por chegar no que queda do mesmo, formo parte grupo Somosarte, colectivo de artistas do Baixo Miño.

  Máis nos últimos meses paso todo o tempo que podo no taller, pois estou comezando con  novas series de traballos, das que amoso nesta exposición algunhas das pezas que comezan a darlles forma.

Engadiría algo máis?

  - Creo que o dito ata o momento pode dar un bo resumo dalgunhas das ideas, conceptos e outras cuestións acerca de quen son e que fago. Poderíamos falar de moitísimas cousas, pero eso daría para outras entrevistas!