DEPORTES

Disputaranse nas instalacións do Centro de Tecnificación Deportiva ás 17,00 horas e as 19,00 horas

PONTEVEDRA ACOLLE MAÑÁ AS FINAIS MASCULINA E FEMININA DA COPA DEPUTACIÓN DE BALONCESTO INFANTIL

·   O campión masculino sairá do partido entre o Marín Peixe Galego e o Club Baloncesto Tui

·      A final feminina enfrontará ao Porriño Baloncesto Base e ao Club Baloncesto Arxil

  Pontevedra acollerá na tarde de mañá as finais masculina e feminina da Copa Deputación de Baloncesto Infantil. Disputarase, tal e como anunciou esta mañá a deputada Begoña Estévez, nas instalacións do Centro de Tecnificación Deportiva.

  O campión masculino será o gañador do partido que ás 17,00 horas enfrontará ao Marín Peixe Galego co Club Baloncesto Tui, que foron os finalistas dos torneos disputados na zona de Arousa-Pontevedra e de Vigo, respectivamente.

  Pola súa banda, do partido entre o Porriño Baloncesto Base e o Club Baloncesto Arxil sairá o equipo campión da categoría feminina. O encontro terá lugar ás 19,00 horas e tamén enfrontará ao campión dos torneos da zona de Vigo coas da zona de Arousa-Pontevedra.

  Promoción do deporte base

  Na rolda de prensa de presentación desta final da Copa Deputación, tanto a deputada Begoña Estévez como o delegado da Federación Galega de Baloncesto en Arousa, José Luis Renda, como os representantes dos clubs destacaron a aposta que a Deputación está a facer pola promoción do deporte base.

  Neste sentido, incidiron especialmente no achegamento das diferentes disciplinas deportivas aos concellos máis pequenos e nos que, de non ser pola implicación de Administración Provincial a través das escolas deportivas, os máis pequenos non terían ocasión de coñecer e interesarse por diferentes disciplinas, como o balonmán, o taekwondo, a patinaxe, o judo, o rugby, a marcha, a natación, ou piragüismo, modalidades todas elas que promove a Deputación en diferentes municipios, xunto co fútbol, o fútbol sala e, a partir do vindeiro ano, tamén o baloncesto.

  Así, os participantes na rolda de prensa agradeceron que se sume este deporte ao programa da Administración provincial e que se achegue, nun primeiro momento, aos nenos e nenas de Moraña, Cuntis e Gondomar, para poder ir estendendo as escolas a novos municipios.