VIGO

FEAFES Vigo muda a súa sede a un novo local máis accesible e mellor comunicado

·        As novas instalacións están situadas na Rúa Serafín Avendaño nº 18, ben comunicadas e cun fácil acceso para todos os usuarios

·         FEAFES Vigo presta atención a persoas con enfermidade mental, ofrecendo información e asesoramento en materia laboral, psicolóxica, xurídica, etc., así como un seguimento integral e personalizado de cada usuario

Ana Escrigas Rodríguez / Vigo

  A delegación viguesa da Federación de Asociacións de Familiares e Persoas con Enfermidade Mental de Galicia, FEAFES, ven de mudar a súa sede. A partir da semana que vén, a entidade desenvolverá a súa actividade nunha nova oficina, situada fronte ás Torres de García Barbón na Rúa Serafín Avendaño nº 18, oficinas 10-11.

  O novo local de FEAFES Vigo atópase moi ben comunicado, pois dispón dunha boa conexión coas liñas de autobuses 17, C5B, C3, 10 e C2. Isto facilitará o achegamento dos usuarios á sede, xa que gran parte da atención que realiza FEAFES Vigo desenvólvese nas propias oficinas.

  FEAFES Vigo pertence á Federación de Asociacións de Familiares e Persoas con Enfermidade Mental de Galicia, FEAFES Galicia, unha entidade sen ánimo de lucro constituída en 1995 que representa os dereitos e necesidades do movemento asociativo das persoas con enfermidade mental. De carácter social, esta entidade ten como obxectivo principal a adopción de medidas que contribúan á mellora da calidade de vida das persoas que sofren problemas de saúde mental e a dos seus familiares.

  Actualmente, FEAFES Galicia agrupa a 14 asociacións repartidas por toda a comunidade galega, das cales 6 pertencen á provincia de Pontevedra e traballan nas localidades de Vilagarcía de Arousa, Pontevedra, Redondela, Vigo, Cangas, A Guarda, Gondomar e Lalín.

  En Galicia hai 41.775 persoas con certificado de discapacidade por enfermidade mental, das cales o 80% ten máis do 65% de minusvalía.  De todas elas, 15.611 pertencen á provincia de Pontevedra, a segunda provincia galega con máis casos tras A Coruña (con 16.346). De toda esta poboación galega afectada pola enfermidade mental, FEAFES Galicia atende a 7.800 persoas, que tan só representan o 19% do total.