PONTEVEDRA

Realizáronse actualizacións masivas en Sanxenxo, Cambados, Cotobade, Mos, A Estrada, Gondomar, Nigrán, Tomiño e O Porriño

OS LABORES DE ACTUALIZACIÓN CATASTRAL QUE O ORAL REALIZA NOS CONCELLOS DA PROVINCIA DERON LUGAR A MÁIS DE 1.500 NOVAS ALTAS NESTE ANO 2013

·       Nos concellos nos que se realizaron labores de actualización xerais, abríronse máis de 5.000 expedientes de alteración catastral.

·       A asistencia directa do ORAL aos concellos permite que os contribuíntes poidan realizar trámites de alta, modificación de datos ou titularidade sen necesidade de desprazarse

·       Desenvolvéronse diversas actuacións puntuais en polígonos industriais

Os labores de actualización catastral que o ORAL está a realizar nos concellos da provincia facilitaron a alta de máis de 1.500 novos inmobles no que vai de ano, aos que hai que sumar outros expedientes de alteración motivados por cambios nos bens declarados e que xa tributaban, como obras de reforma, ampliación ou construcións de anexos, que suman unhas 5.000 actuacións.

A meirande parte destes expedientes de alteración abríronse naqueles concellos nos que ORAL procedeu a un traballo completo de actualización e mantemento catastral, que, no último ano, foron os municipios de Sanxenxo, Cambados, Mos, A Estrada, Gondomar, Nigrán, Tomiño, Cotobade e O Porriño.

En todos eles se revisou o Padrón completo de cada concello e procedeuse a citar aos contribuíntes para a actualización de datos.

Os traballos realizados este ano veñen a completar os que se levan facendo no último lustro e que incluíron procedementos masivos de actualización na práctica totalidade dos concellos da provincia adheridos ao ORAL, que na actualidade son 46.

Actualizacións masivas

Así, no Concello de A Estrada foi onde se procedeu a citar a un maior número de contribuíntes, acadando os 2.000, e tamén no que máis expedientes de actualización catastral se abriron, con 1.500 (incluíndo novas altas e outras modificacións).

En Mos citáronse 1.250 contribuíntes e xeráronse 700 expedientes de revisión catastral; os mesmos que en Sanxenxo, onde se citou a uns 1.500 contribuíntes.

Pola súa banda, en Cambados deuse atención personalizada a 700 persoas e abríronse uns 450 expedientes, o mesmo número que en Gondomar.

En Nigrán xeráronse 300 novos expedientes, en Tomiño 300, en Cotobade 460 e en O Porriño 250.

Esta labor que o ORAL está a realizar non só permite mellorar a situación económica dos concellos, senón que, sobre todo, é unha garantía de equidade, facilitando que todos os cidadáns contribúan segundo o que lle corresponde facelo.

Facilidades

Nesta liña, o ORAL non só desenvolveu neste ano actualizacións masivas do catastro, senón que está a prestar apoio e asistencia aos contribuíntes de numerosos concellos da provincia en instalacións municipais, evitándolle así desprazamentos para realizar xestións relacionadas coa administración tributaria catastral.

Así, son moitos os municipios aos que con certa frecuencia técnicos do ORAL se achegan para atender consultas e dúbidas dos contribuíntes e para facilitarlles a realización de trámites que, ás veces, poden resultarlles complexos se non contan con esta asistencia.

Vilanova de Arousa, Cangas, Moaña, O Porriño, Poio, Ponteareas, Mondariz ou Mondariz-Balneario son só algúns dos concellos nos que o ORAL presta atención personalizada e regular aos veciños e veciñas.

Polígonos industriais

Outra das liñas de actuación que durante o que vai de ano desenvolveu o ORAL foi o de desprazarse a varios concellos que así o solicitaron para facilitar a alta de grupos de inmobles que ata o momento non tributaban.

Estas labores afectaron de forma especial a naves en polígonos industriais e a grupos de vivendas de recente construción e que non estaban incluídas no catastro.

Entre os concellos que se beneficiaron desta asistencia concreta figura Vilanova de Arousa, onde, entre outras actuacións puntuais, se procedeu a unha actualización da situación catastral de inmobles no polígono de Tremoedo; Meaño, onde se están a levar a cabo traballos puntuais de actualización en diferentes zonas do concello e que deu orixe na primeira fase a unhas 40 novas altas en zonas industriais; ou O Porriño, Tui, Ribadumia, Barro, Valga, Ponte Caldelas ou Campo Lameiro onde tamén se está revisando o catastro nos polígonos industriais.

Novas ponencias de valores

Cómpre destacar tamén o apoio técnico e económico que o ORAL presta a aqueles concellos que están a abordar unha nova ponencia de valores, cos que colabora en diversos traballos como os estudos de mercado, a xestión de notificacións ou a colaboración na atención ao público.

Nesta situación están actualmente o concello de Cotobade e Salvaterra de Miño. Nos dous casos, o ORAL realizou previamente unha actualización masiva do padrón no pasado ano 2012, facilitándolle así a Xerencia Territorial do Catastro de Pontevedra, dependente do Ministerio de Facenda e Administracións Públicas, o desenvolvemento das labores de elaboración das novas ponencias de valores.