TUI

Os candidatos populares valoran a lexislatura de Feijoo na comarca de Baixo Miño

“As medidas de austeridade permitiron que Baixo Miño poida contar con máis e mellores servizos”

·     Castro citou o novo centro de Día de Tomiño, cun investimento de case 1,3 millóns de euros.

           Nava Castro, Moisés Rodríguez, José Manuel Cores e Paula Romeu

Infogauda / Tui

Os candidatos populares ás Eleccións Autonómicas, José Manuel Cores Tourís, Nava Castro e Paula Romeu reuníronse en Tui para facer balance da lexislatura que está a rematar e a súa repercusión na comarca do Baixo Miño acompañados polo alcalde de Tui, Moisés Rodríguez.

Nava Castro explicou que “esta foi unha lexislatura que desde o primeiro momento se presentou difícil polas consecuencias dunha crise xa asentada na comunidade, aínda que algúns a negaran, sumada a que a tendencia ao despilfarro e á mala xestión do bipartito que deixaron un buraco nas contas de 2.000 millóns de euros”.

“Pero as medidas de aforro, de eficiencia, de control de gasto e a política de austeridade de Núñez Feijoo non foron en balde, senón que foron a base fundamental para que Galicia poida contar con máis e mellores servizos mentres que noutras comunidades se están eliminando", dixo Nava Castro..

A modo de exemplo Castro citou o novo centro de Día de Tomiño, cun investimento de case 1,3 millóns de euros, os 3 centros plurilingües ou os 13 centros da comarca incluídos no Plan Abalar.

“Unha mínima mostra do traballo feito nesta comarca, na que se investiron nesta lexislatura 115,2 millóns de eros, algo que sería totalmente imposible sen un Goberno coma o de Feijoo”, explica a candidata popular.

Castro asegurou que as mesmas medidas que lle valeron o alcume de austero a Feijoo e coas que algún quixeron criticalo no comezo do seu mandato son as que permitiron que Baixo Miño conte hoxe con máis e mellores servizos, e o que permitiu que se investisen 46,6 millóns de euros en obras de saneamento e abastecemento de auga en todos os concellos da zona.

Cores Tourís destacou ademais a mellora das estradas da comarca, como a PO-552 entre Baiona e A Guarda, e os PXOM municipais.

Explicou que o fomento de emprego e o apoio ao sector empresarial e industrial foi outro dos eixes prioritarios do Goberno galego nestes case 4 anos. “Aí están os 40 millóns de euros que a Consellería de Industria destinou á mellora económica e empresarial da comarca, ou os máis de 8 millóns de euros investidos nos 5 concellos da comarca en plan de xeración de emprego e en obradoiros dos que se beneficiaron preto de 1.500 persoas”.

Os candidatos populares consideran que este é o exemplo de boa xestión e sinalaron que os veciños da comarca de Baixo Miño deberían preguntarse que pasaría nestes anos de dificultades se en lugar de goberno unido, forte e cunha liña de actuación clara tivesen na Xunta a un goberno dividido, que se facía competencia a si mesmo e que despilfarraba máis do que investía.