PONTEVEDRA

MAÑÁ ABRE O PRAZO PARA INSCRIBIRSE NO PROGRAMA SAÚDE E BENESTAR QUE PON EN MARCHA A DEPUTACIÓN

Os interesados poderán presentar as súas solicitudes ata o 9 de agosto

Os interesados en inscribirse para participar no programa Saúde e Benestar que, un ano máis, pon en marcha a Deputación Provincial de Pontevedra poderán facelo a partir de mañá, martes, 17 de xullo.

Así o recolle hoxe o Boletín Oficial da Provincia e a páxina web da Deputación (www.depo.es), onde os interesados non só poderán obter información do contido do programa senón tamén descargar o formulario para a correspondente solicitude, que poderán presentar ata o vindeiro 9 de agosto.

Nesta ocasión, as persoas que participen neste programa poderán elixir entre 7 establecementos termais da provincia para pasar unha estadía de 6 días e 5 noites a un prezo reducido, que oscila entre os 190 e os 235 euros por persoa para os 6 días.

O programa de Saúde e Benestar ten o  dobre obxectivo de, por un lado, proporcionar as persoas maiores de 50 anos, pensionistas ou con necesidades de respiro familiar, a posibilidade de pasar uns días en establecementos hostaleiros da provincia, a prezos reducidos e, por outro, dinamizar a economía contribuíndo a manter a actividade do sector hostaleiro e termal durante a temporada baixa, co que se fomenta a consolidación de postos de traballo.

As persoas que se acollan a este servizo poderán recibir unha atención especializada con tratamentos termais e actividades lúdicas e culturais, o que redunda tanto na mellora da súa saúde como na calidade de vida.

En concreto, os establecementos ofertados no programa deste ano, que será xestionado pola empresa Viaxes Iberia, son o Hotel Hesperia Isla de la Toja; o Hotel Thalaso Atlántico de Oia; o Hotel Spa Galatea en Sanxenxo, o Hotel Bienestar Moaña Thalaso Spa e o Norat Marina Spa, en O Grove; o Hotel Torre do Deza de Lalín e o Spa Oca Katiuska de Silleda.