MÉXICO

O FESTICLOWN WIRIKUTA INAUGURARASE ANTE OS 50.000 ASISTENTES AO WIRIKUTA FEST

Iván Prado actuará este sábado 26 de Maio en México DF xunto a Julieta Venegas e Enrique Bunbury dentro do Wirikuta Fest

O pallaso internacional Iván Prado, de orixe galega, actuará para as 50.000 persoas que encherán o Foro Sol do Wirikuta Fest, en México DF, en solidariedade co pobo Huichol e en contra das minas a ceo descuberto que o goberno mexicano “quere impor” na reserva espiritual do Deserto de Wirikuta (San Luís Potosí).

  

Esta primeira actuación será o pistoletazo de saída do Festiclown Wirikuta, festival de circo solidario organizado por Pallasos en Rebeldía (colectivo de circo e clown solidario), que se desenvolverá do 26 de Maio ao 10 de Xuño na República Mexicana, en defensa das comunidades Huicholas e da súa reserva ecolóxica-espiritual do Deserto de Wirikuta.

Festiclown Wirikuta

Pallasos en Rebeldía realizará actuacións en colexios e cárceres da cidade de México, Galas de Circo Solidarias en cidades mineiras e poboacións do Deserto de Wirikuta e pasacalles reivindicativos en manifestacións no Zócalo do DF. Nunha intensa xira rebelde a favor dos pobos indíxenas e do seu patrimonio cultural.

Artistas de México, Colombia, Italia, Francia e do Estado Español, actuarán no Festival altruistamente para defender os dereitos históricos das comunidades Wixárikas (coñecidas en castelán como Huicholes), famosos no mundo enteiro por atesourar un patrimonio cultural-ambiental e unha espiritualidade prehispánica única en México.

Pallasos en Rebeldía e o pobo Wixárika

Como explica o Portavoz de Pallasos en Rebeldía e Director do Festiclown, Iván Prado:

"Os Wixárikas son para a defensa ambiental e a riqueza cultural mexicana o que os zapatistas son para a loita pola democracia e a xustiza en México” afirma o artista logo de visitar ás Comunidades Huicholas, entre as numerosas viaxes solidarias que realizou a terras mexicanas desde 1995 con Pallasos en Rebeldía.

Durante estes 17 anos, Iván Prado apoiou e colaborou con diversas organizacións indíxenas pola defensa da terra e os valores que ela inspira.

Entre esas amizades forxadas en México atópanse a establecida con Masacalli, unha das organizacións culturais que integra a Fronte de Defensa de Wirikuta, que xunto ao K Baret dels Refugiats e o Cirko Demente conforman a rama mexicana do Festiclown Wirikuta.