A GUARDA

O CENTRO CULTURAL DE A GUARDA ACOLLE UNHA EXPOSICIÓN DE PINTURA DO PINTOR ANTONIO FERNÁNDEZ GÓMEZ

Infogauda / A Guarda

A sala de exposicións do Centro Cultural e Social de A Guarda, acolle desde o día 1 o 22 de agosto, unha exposición do pintor Antonio Fernández Gómez (Goián 1882-1970).

A exposición do mestre do realismo galego, estará aberta de luns a sábado de 10:00 a 14:00 horas e de 16:00 a 20:00 horas.

O acto de inauguración terá lugar este sábado día 1 de agosto, ás 20:30 horas no salón de actos do Centro Cultural e Social, con unha conferencia do Académico Numerario da Sección de Expertos nas Artes, xornalista e crítico de arte, Francisco de Pablos Holgado e a actuación musical do cantautor guardés Tino Baz.

Polo vencello que Antonio Fernández tivo co pobo de A Guarda, xa que viu en varias ocasións desde a súa vila matria até o noso mar, para pintar como él sabía, esas fermosas paisaxes do litoral guardés, a exposición é un fermoso xeito de adicarlle unha bén merecida homenaxe póstuma.

Como poderemos comprobar visitando a exposición, nos seus lenzos, Antonio Fernández supo reflectir coma ninguén, a beleza das ondas, que atraídas polas rochas, como se éstas fosen un imán, dibuxan sen tregua, unha sinfonía de azuis, augamariñas e brancos de espuma salgada.

Asemade tamén poderemos apreciar o xeito minucioso de traballar que tiña o mestre Antonio Fernández. Con un exquisito dibuxo previo, e non poucos bocetos denantes de ir a obra definitiva, así como un concerto matérico de pinceladas xustas, Antonio Fernández pintou paisaxes insuperables, figuras, bodegóns, frores,..., e tributou, coma ninguén, unha homenaxe o gando vacuno e ovino, elevándoos co seu maxisterio, o protagonismo de moitas das súas obras pictóricas.

A exposición de Antonio Fernández Gómez servirá tamén para que as xeracións máis mozas coñezan de preto a altura artística de un goianés universal con unha traxectoria vital digna de inmortaliza-la no cinema, tendo como documentos básicos a monografía que lle adicou o escritor e poeta Eliseo Alonso Rodríguez, e tamén as testemuñas de moitos goianeses residentes no Baixo Miño e tamén na diáspora.

Antonio Fernández Gómez coñeceu a dureza na emigración a Brasil, e logo de supera-los atrancos que sofreu nunha facenda onde traballaba, demostrou súas cualidades artísticas non soio en Santos, senón en Antícoli Corrado (Italia) e por suposto en Galicia.

Súa derradeira exposición en vida, tería lugar na cidade de Vigo pouco antes do seu pasamento. Daquela, e desde moitos antes desa mostra, Antonio Fernández Gómez, era todo un referente para moitos creadores, como Xavier Pousa, Magín Picallo, Eliseo Alonso,..., que compartiron co mestre moitas inquedanzas artísticas.