Julia Vaquero asina unha vitoria incontestábel no III Trail Asalta Montes 2026
• Cunha superioridade incontestábel dende os primeiros compases da modalidade, a atleta de A Guarda avantaxou en case quince minutos á segunda clasificada
Ricardo Rodríguez Vicente/Deportes
A mítica atleta guardesa Julia Vaquero Sousa volveu demostrar a súa pegada eterna no atletismo galego ao proclamarse brillante gañadora absoluta e da súa categoría no III Trail Asalta Montes / Salvamontes 2026, celebrado onte domingo en Tameiga (Mos). A corredora, que vestía as cores do Club Atletismo Veteranos de Samil, fixo valer a súa clase nunha xornada marcada polo alto nivel dos participantes e a esixencia do trazado.
Vaquero cruzou a liña de meta cun crono oficial de 56 minutos e 37 segundos, impoñendo un ritmo demoledor de 5:39 minutos por quilómetro que resultou inalcanzábel para o resto das súas competidoras directas. Cunha superioridade incontestábel dende os primeiros compases da modalidade, a de A Guarda avantaxou en case quince minutos á segunda clasificada, Mónica Figueiras Fernández, quen detivo o reloxo en 1:11:32. O podio de honra completouno Verónica Pampillón Seijo, cun tempo de 1:19:17.
Con este triunfo, a olímpica en Atlanta 96 confirma que o seu instinto competitivo segue intacto e engade un novo éxito ao seu dilatado palmarés, liderando unha proba que volveu ser unha gran festa do deporte de montaña.
Ningún comentario:
Publicar un comentario