O ROSAL

O Rosal prepárase para recibir á Banda Xuvenil de Monção  

Ricardo Rodríguez Vicente/O Rosal

 O vindeiro domingo, 4 de outubro, o Auditorio Municipal do Rosal converterase nun punto de encontro para a música e a amizade entre Galicia e Portugal coa visita da Banda Xuvenil de Monção.  

 A formación portuguesa achegarase ao Rosal para ofrecer, a partir das 19:00 horas (hora española), un concerto de preparación de cara á súa participación no XIX Certame Galego de Bandas 2026, unha cita na que terá a oportunidade de mostrar o seu talento e o traballo desenvolvido nos últimos meses.

 Será, polo tanto, unha tarde especialmente significativa, non só pola calidade musical que se agarda do concerto, senón tamén polo valor do encontro entre dúas comunidades unidas por unha fonda proximidade cultural e musical. O público poderá gozar dunha actuación na que a música volverá exercer como ponte entre as dúas beiras do Miño.  

 Desde a Agrupación Musical do Rosal (AMDOR) queren dar unha calorosa benvida á Banda Xuvenil de Monção e acompañar os seus integrantes neste importante camiño cara ao certame. A asociación destaca a ilusión por compartir esta xornada de música, convivencia e amizade, ofrecéndolles a acollida e o agarimo que merece unha formación que chega ao Rosal con moitas ganas de facer soar os seus instrumentos.  

 A cita será o domingo 4 de outubro, ás 19:00 horas, no Auditorio Municipal do Rosal. Unha oportunidade para desfrutar da música en directo e, ao mesmo tempo, apoiar e acompañar a unha nova xeración de músicos portugueses nos momentos previos a unha importante cita musical.

 Desde o Rosal, xa só queda desexarlles moita sorte no XIX Certame Galego de Bandas 2026 e que o seu talento e a súa música brillen ben alto.  

 Agardámosvos no Rosal!