VIGO

O 80% dos camiñantes son estranxeiros  

O Camiño da Costa enfila o seu peregrino 100.000 tras outro verán de récord cun incremento d0 26%, o maior de todos os itinerarios Xacobeos 

•  A delegada da Xunta en Vigo, Ana Ortiz, fixo balance este martes dos datos da ruta que atravesa Vigo e visitou aos peregrinos que se aloxan no albergue

•  “Por desgraza aínda temos que lamentar a negativa de Abel Caballero a sinalizar a ruta en Vigo, o que provoca que numerosos peregrinos se perdan”, lembrou Ortiz

A delegada territorial da Xunta en Vigo, Ana Ortiz, e o xefe territorial de Turismo, Felipe Ferrero, visitaron este martes o Albergue de Peregrinos “Juan Manuel López Chaves”

Foto: XG

Infogauda/Vigo

 A delegada territorial da Xunta en Vigo, Ana Ortiz, e o xefe territorial de Turismo, Felipe Ferrero, visitaron este martes o Albergue de Peregrinos “Juan Manuel López Chaves” para facer balance da afluencia de peregrinos este ano no Camiño Portugués da Costa.  

 Os representantes autonómicos, que recibiron a varios peregrinos de diferentes nacionalidades como Brasil ou Perú que realizan o itinerario xacobeo, destacaron o acerto do Goberno galego cando decidiu investir 1,8 millóns de euros para dotar á cidade do seu primeiro albergue público no Casco Vello.  

 Segundo explicou Ana Ortiz, a día de hoxe, un total de 83.366 camiñantes xa recolleron a súa compostela tras pasar por Vigo. “É unha cifra estratosférica, un 26 por cento máis que en 2025, cando houbo 90.000 peregrinos, pero quero incidir en que o dato real é moito maior, posto que hai centos que non recollen a súa acreditación no Bispado de Santiago”, apuntou.  

 Ademais, a delegada da Xunta destacou que “todo indica que pecharemos este ano superando a máxica cifra de 100.000”. Tamén indicou que o 80 por cento dos camiñantes que pasan por Vigo son estranxeiros (9.500 americanos, 9.200 italianos, 7.400 alemáns e 4.000 polacos). “Destaco isto porque falamos de peregrinos con alto poder adquisitivo que paran varios días en Vigo, nos nosos hoteis, comercios e restaurantes”, apuntou.  

 Ana Ortiz lembrou que desde que foi declarado oficial o Camiño Portugués da Costa, en maio de 2016, xa realizaron esta ruta máis de 353.000 persoas. “Creo que con iso queda todo dito da importancia e da potencialidade do trazado que pasa por Vigo, pero por desgraza temos que lamentar a negativa do alcalde Abel Caballero a sinalizar a ruta ao paso polas nosas rúas, o que provoca que numerosos peregrinos se perdan”, remachou.