PONTEVEDRA

FEMUPO pecha FEMUPOCONTIGO 2026 con 30 mulleres atendidas e oito insercións laborais estables 

O balance de FEMUPOCONTIGO 2026 é moi positivo, tanto pola alta participación e implicación das usuarias como polo acompañamento continuado realizado ao longo do programa

Foto: FEMUPO

Raquel Touriño/Pontevedra 

 A Federación pola Igualdade das Mulleres da Provincia de Pontevedra (FEMUPO) pechou o pasado 31 de agosto unha nova edición do programa FEMUPOCONTIGO, unha iniciativa de atención integral dirixida a mulleres en situación de desemprego e vulnerabilidade. Nesta edición, o programa permitiu atender e acompañar a un total de 30 mulleres nos seus procesos persoais, sociais, formativos e laborais. 

 O balance de FEMUPOCONTIGO 2026 é moi positivo, tanto pola alta participación e implicación das usuarias como polo acompañamento continuado realizado ao longo do programa. A intervención desenvolveuse atendendo ás circunstancias e necesidades concretas de cada participante, establecendo itinerarios individualizados e combinando a atención persoal con accións grupais destinadas a reforzar as súas competencias e favorecer a súa autonomía. 

 Un dos resultados máis destacados desta edición é a incorporación ao mercado laboral de 8 das 30 participantes, que conseguiron un emprego estable durante o desenvolvemento do programa. Isto supón que o 26,7 % das mulleres atendidas acadaron unha inserción laboral estable, un resultado especialmente significativo ao tratarse dun programa dirixido a mulleres desempregadas que poden presentar maiores dificultades para acceder ou reincorporarse ao mercado laboral. 

 FEMUPOCONTIGO vai, non obstante, máis alá da procura inmediata dun posto de traballo. O programa aborda de maneira integral as diferentes barreiras que poden condicionar a inserción sociolaboral das mulleres, ofrecendo orientación e información sobre recursos, acompañamento social, atención psicolóxica, asesoramento xurídico, mediación intercultural e/ou familiar, formación para a adquisición de habilidades persoais e sociais e mellora das competencias para a empregabilidade. 

 A isto súmase un importante traballo de orientación laboral e acompañamento na procura activa de emprego, no que se traballan cuestións como a definición dos obxectivos profesionais, a elaboración e actualización do currículo, a preparación de entrevistas, as competencias dixitais, o acceso a ofertas de emprego e a adquisición de ferramentas que permitan ás participantes desenvolver unha procura laboral cada vez máis autónoma e eficaz.  

 Desde FEMUPO destacan especialmente o valor do acompañamento próximo e continuado. A experiencia do programa demostra que, ante situacións de vulnerabilidade, non abonda unicamente con facilitar información ou realizar accións formativas puntuais. É necesario acompañar os procesos, realizar seguimentos individualizados, reforzar a motivación e a autonomía das participantes e facilitar a súa conexión cos recursos e servizos existentes. 

 A elevada participación nas actividades e o grao de implicación das usuarias ao longo de 2026 poñen tamén de manifesto a importancia de contar con espazos de apoio, formación e acompañamento adaptados ás necesidades reais das mulleres. 

 O peche de FEMUPOCONTIGO 2026 deixa, deste xeito, un balance satisfactorio. As oito insercións laborais estables constitúen un dos resultados máis visibles, pero o impacto do programa abrangue tamén a mellora das competencias persoais e profesionais, a autonomía, a confianza e a capacidade das participantes para afrontar con maiores recursos os seus procesos de inserción social e laboral. 

 Con esta nova edición finalizada, FEMUPO reafirma o seu compromiso coa igualdade de oportunidades e coa posta en marcha de programas que permitan ofrecer respostas reais ás mulleres en situación de vulnerabilidade, favorecendo a súa empregabilidade, autonomía económica e inclusión social na provincia de Pontevedra. 

 Estas accións son posibles grazas á subvención da Xunta de Galicia a entidades de iniciativa social sen ánimo de lucro para programas dirixidos a mulleres en situación de especial vulnerabilidade e están cofinanciadas por la Xunta de Galicia (Consellería de Política Social e Igualdade – Dirección xeral de Promoción da Igualdade) e pola Unión Europea no marco do programa FSE+ Galicia 2021-2027. 

 As persoas interesadas na próxima edición poden solicitar máis información a través dos canais habituais de contacto de FEMUPO ou inscribirse en https://forms.gle/nqoYzKGnfAQEwPmHA