DEPORTES

BALONMÁN FEMININO

Á venda as entradas para a primeira eliminatoria da EHF European League 

• Este luns saen á venda as entradas para a Round 2 da EHF European League que acolle o Atlético Guardés esta fin de semana na Sangriña ante o Boden sueco 

• Con prezo reducido para os abonados e entrada gratuíta para os socios, o Club ofrece entradas de día a un prezo xeral de 30 euros e bonos para os dous partidos que van ata os 45 euros 

• Os partidos xogaranse este sábado e domingo ás 12.00 horas en ambos os casos 

Redacción Deportes/A Guarda

 O Atlético Guardés prepárase para dar comezo á súa nova aventura europea. Esta fin de semana, as de José Ignacio Prades reciben ao Boden Handboll IF sueco para disputar integramente a Round 2 da EHF European League, primeira eliminatoria a dobre partido cuxas dúas voltas xogaranse o sábado 3 e o domingo 4 ás 12.00 horas. As entradas saíron á venda este luns e poden adquirirse xa en Cluber ou na oficina do Club en horario de tarde, con opcións de entrada dun día ou de bono para ambos os días a distintos prezos. 

 O Guardés prepárase para unha semana intensa de competición. Á xornada de Liga de mañá en Lanzarote súmase un dobre reto europeo esta fin de semana, onde as de José Ignacio Prades recibirán ao Boden Handboll de Suecia para disputar a primeira eliminatoria que lles corresponde nesta edición da EHF European League. O equipo miñoto regresa á segunda competición continental incorporándose na Round 2, unha eliminatoria a dobre partido que o pavillón da Sangriña acollerá este sábado 3 e domingo 4 de outubro en horario matutino, ás 12.00 horas de cada un dos dous días. 

 O Club pon este luns 28 de setembro á venda as entradas para o primeiro evento europeo do ano, como vén sendo habitual, con distintas opcións de acceso e prezos segundo o tipo de afeccionado. Existe a posibilidade de comprar a entrada soamente para un dos dous días ou ben un bono para toda a fin de semana a un prezo máis económico, aínda que os abonados terán unha rebaixa adicional. 

 A entrada xeral (afeccionados de 20 anos en diante que non sexan socios nin abonados do Club) contempla 30 euros por día e 45 euros para o bono, e pode adquirirse xa de forma en liña na plataforma Cluber https://app.cluber.es/legacy/clubes/b84295873d95a8a4fb331b3b487c16e3cb4794ea/pagos/6aba2b061d61a021678001

 Así mesmo, estes afeccionados poderán adquirila de xeito presencial tanto na oficina do pavillón desde hoxe ata o venres en horario de 17.00 a 20.00 horas como os dous días de partido desde as 11.00 horas. 

 Tamén poden comprarse xa na mesma ligazón de Cluber as entradas Sub20 (afeccionados de 15 a 19 anos) a un prezo de 15 euros o día e 25 euros o bono de dous días; e as entradas Sub15 (de 10 a 14 anos), a 8 euros o día e 12 euros o bono. 

 Pola súa banda, os abonados contarán coas mesmas modalidades a un prezo reducido con respecto á entrada xeral. O día baixa aos 20 euros, igual que unha entrada de Liga, e o bono para toda a fin de semana estará a 30 euros. Neste caso, non será posible adquirir estas entradas en liña, polo que os abonados deberán adquirilas unicamente na oficina do Club entre semana ou ben o sábado e domingo en despacho de billetes. 

 Finalmente, os socios nominativos teñen a entrada incluída no prezo do seu carné, polo que o seu acceso a estes dous encontros será libre. Neste caso non deberán recoller ningún tipo de entrada nin durante a semana na oficina nin a fin de semana  no despacho de billetes: abonda con que mostren o seu carné na entrada do pavillón antes dos partidos. 

 O Club agradece que, na medida do posible, os afeccionados recorran á venda anticipada e adquiran as súas entradas na oficina ou en Cluber ao longo destes días para liberar o despacho de billetes todo o posible o sábado e asegurar un acceso puntual ao pavillón.