A GUARDA

A Guarda estreita lazos con Les Sables-d’Olonne durante a visita da delegación francesa  

Na recepción participaron o alcalde da Guarda, Roberto José Álvarez Carrero; a alcaldesa do Rosal, Ánxela Fernández Callís; o concelleiro do Rosal, Germán Fernández Rodríguez; e o alcalde da Laracha, José Manuel López Varela, representantes de tres municipios unidos por un Pacto de Amizade e que nesta ocasión compartiron protagonismo coa delegación francesa

Fotos: CdaG

Infogauda/A Guarda

 O pasado mércores, o Concello da Guarda acolleu a recepción oficial á delegación de Les Sables-d’Olonne, que se desprazou a Galicia no marco do irmandamento que mantén con A Laracha. O encontro serviu para reforzar os vínculos de amizade e cooperación entre as localidades participantes e para dar inicio a un programa de actividades destinado a achegar á comitiva francesa ao territorio, ás súas tradicións e aos seus recursos.  

 Na recepción participaron o alcalde da Guarda, Roberto José Álvarez Carrero; a alcaldesa do Rosal, Ánxela Fernández Callís; o concelleiro do Rosal, Germán Fernández Rodríguez; e o alcalde da Laracha, José Manuel López Varela, representantes de tres municipios unidos por un Pacto de Amizade e que nesta ocasión compartiron protagonismo coa delegación francesa.  

 A comitiva de Les Sables-d’Olonne, formada por arredor de trinta persoas, estivo encabezada pola presidenta do Comité de Irmandamento, Martine Girardeau, e pola concelleira de Irmandamentos, Corine Gino. A súa visita permitiu coñecer de primeira man diferentes espazos, costumes e propostas do territorio galego, nun programa pensado tamén para favorecer o intercambio cultural e a convivencia entre as comunidades.  

 Dentro desta programación, A Guarda tivo un papel destacado como porta de entrada a Galicia do Camiño Portugués da Costa. Parte da delegación francesa aproveitou a estadía para percorrer dúas etapas deste itinerario xacobeo: o tramo entre A Guarda e Oia e o comprendido entre Oia e Baiona.  

 A través destas rutas, os visitantes puideron descubrir a paisaxe da costa sur de Galicia e achegarse á experiencia do Camiño, combinando actividade ao aire libre, patrimonio e contacto directo co territorio. 

 A visita da delegación de Les Sables-d’Olonne deixa así novos momentos compartidos entre galegos e franceses e contribúe a consolidar os lazos que, a través dos irmandamentos e do Pacto de Amizade, unen A Guarda, O Rosal e A Laracha. Unha relación que atopou nestes días unha nova oportunidade para seguir medrando arredor do intercambio cultural, o coñecemento mutuo e a posta en común das riquezas de cada territorio.