O prazo de solicitudes está aberto ata o 15 de setembro
Abel Losada anima á mocidade agraria a participar no programa Cultiva, que ofrece 11 estancias formativas na provincia
• Cinco explotacións de O Rosal, Cerdedo-Cotobade, Vila de Cruces, Redondela e Tomiño forman parte do catálogo de explotacións de acollida
• O programa cobre os gastos de aloxamento, manutención e transporte e contempla unha compensación polos gastos de substitución na explotación
Infogauda/Pontevedra
O subdelegado do Goberno en Pontevedra, Abel Losada, anima á mocidade interesada a solicitar a súa participación no programa Cultiva 2026, impulsado polo Ministerio de Agricultura, Pesca e Alimentación para facilitar estancias formativas en explotacións agrícolas e gandeiras de referencia. O prazo para presentar as solicitudes permanecerá aberto ata o 15 de setembro.
Losada destacou que a provincia de Pontevedra oferta 11 estancias formativas en cinco explotacións modelo de acollida, situadas nos concellos de O Rosal, Cerdedo-Cotobade, Vila de Cruces, Redondela e Tomiño. Estas propostas forman parte das 58 estancias dispoñibles en Galicia e das 300 ofertadas no conxunto de España.
“O programa ofrece aos profesionais máis novos do noso sector primario a oportunidade de aprender directamente doutras explotacións que son referentes pola súa innovación, sustentabilidade ou modelo de negocio e de trasladar posteriormente ese coñecemento aos seus propios proxectos”, sinalou o subdelegado, quen animou á mocidade interesada “a aproveitar unha iniciativa que favorece a formación, o intercambio de experiencias e o relevo xeracional no rural”.
Cinco explotacións pontevedresas
A oferta provincial abrangue unha ampla variedade de actividades e modelos produtivos. No Rosal, a estancia desenvolverase nunha explotación de agricultura ecolóxica dedicada á produción de froitas, hortalizas, leguminosas e oleaxinosas, que figura ademais entre as mellor valoradas polos participantes no programa en 2024.
Cova da Abella, en Cerdedo-Cotobade, acollerá seis estancias entre febreiro e maio. Trátase dun proxecto apícola e micolóxico que conta con arredor de 200 colmeas e que combina a produción de mel coa de cogomelo shiitake ecolóxico sobre troncos de carballo.
En Vila de Cruces, a formación terá lugar nunha explotación dedicada á cría e engorde de Porco Celta e bovino de carne de raza Rubia Galega, que aposta pola conservación das razas autóctonas, a venda directa e a comercialización con marca propia.
A oferta complétase cunha explotación hortícola en Redondela e cunha explotación viveirística en Tomiño, esta última cunha clara aposta pola dixitalización, a automatización dos procesos e o uso eficiente dos recursos. A explotación de Tomiño acollerá dúas das estancias ofertadas na provincia.
Solicitudes ata o 15 de setembro
O programa Cultiva está dirixido a profesionais agrarios titulares de explotación de ata 40 anos, así como a persoas de 41 ou máis anos que se instalasen no sector nos últimos cinco anos. As persoas participantes poden escoller explotacións con producións iguais ou diferentes ás súas e situadas en calquera punto do territorio nacional.
O Ministerio cobre os gastos de aloxamento, manutención e transporte durante a estancia e contempla tamén unha compensación polos gastos de substitución para que unha terceira persoa poida atender e xestionar a explotación de orixe durante ese período. O programa conta este ano cunha dotación inicial de 1,2 millóns de euros, ampliables.
Na adxudicación das prazas teñen prioridade as mulleres, as persoas incorporadas máis recentemente á actividade agraria e aquelas que non participasen en edicións anteriores.
Desde a posta en marcha do proxecto piloto en 2020, máis de 900 persoas participaron no programa Cultiva. As estancias desta convocatoria comezarán a desenvolverse a partir de xaneiro de 2027 e as solicitudes poden presentarse, ata o 15 de setembro, a través da sede electrónica do Ministerio de Agricultura, Pesca e Alimentación.
Ningún comentario:
Publicar un comentario