A Guarda sitúase na vangarda do debate sobre o control da acacia
• A Guarda acolleu o sábado, 13 de xuño a I Xornada de Xestión e Control da Acacia organizada pola Comunidade de Montes Veciñais en Man Común da Guarda
• Na que expertas de Galicia e Portugal compartiron os seus coñecementos ante máis de 60 persoas asistentes que se achegaron desde máis de 20 concellos galegos.
Noé Ferreira-Rodríguez/A Guarda
A Guarda converteuse o pasado sábado, 13 de xuño nun punto de encontro de referencia para abordar un dos principais desafíos ambientais que afectan actualmente aos montes galegos coa celebración da I Xornada de Xestión e Control da Acacia, organizada pola Comunidade de Montes Veciñais en Man Común da Guarda.
A actividade reuniu a un numeroso publico procedente gran parte da xeografía galega confirmando o interese existente arredor da expansión desta especie invasora e da procura de solucións eficaces para a súa xestión.
Entre as persoas asistentes atopábanse representantes dun amplo abano de entidades, desde comunidades de montes e propietarios forestais, a profesionais do sector forestal, persoal investigador e estudantado universitario, organizacións non gobernamentais ambientais, persoal da administración vencellado á xestión ambiental, profesorado especializado en formación forestal e persoas a título individual interesadas na conservación e restauración dos montes.
A xornada naceu coa vontade de crear un espazo de transferencia de coñecemento, favorecendo o encontro entre a investigación científica, a experiencia práctica acumulada durante décadas sobre o territorio polas comunidades de montes e a visión do traballo da administración pública. Ao longo da mañá abordáronse cuestións relacionadas coa expansión das acacias en Galicia, os seus impactos ecolóxicos, económicos e sociais, así como as diferentes ferramentas dispoñibles para o seu control e xestión, incluíndo os medios mecánicos, biolóxicos e químicos.
O bloque científico contou coa participación de Luis González Rodríguez, da Universidade de Vigo, e Liliana Neto Duarte, da Universidade de Coimbra. As súas intervencións permitiron afondar no coñecemento da bioloxía das acacias, os procesos que favorecen a súa expansión e as estratexias de restauración ecolóxica e control actualmente dispoñibles. Entre as principais mensaxes trasladadas destacou a necesidade de apostar por unha xestión sostida no tempo, baseada no coñecemento científico e no fortalecemento da vexetación autóctona como ferramenta fundamental para aumentar a resiliencia dos ecosistemas.
A continuación, Manuel Lopes Rodrigues, da Comunidade de Montes de Teis, e Félix Parada Mouriño, do Servizo de Patrimonio Natural de Pontevedra, compartiron experiencias prácticas desenvolvidas ao longo de décadas de traballo sobre o territorio. As súas intervencións permitiron coñecer casos reais de restauración ambiental, control de especies invasoras e recuperación de espazos naturais, poñendo de manifesto a importancia da continuidade das actuacións e da implicación social na conservación do territorio.
A xornada rematou cunha visita técnica ao Monte Trega para coñecer a experiencia de control biolóxico co pastoreo caprino que desenvolve a Comunidade de Montes de Camposancos, e as explicacións de Francisco Alejandro López Núñez, investigador da Universidade de Coimbra, sobre a introdución da avispilla Trichilogaster acaciaelongifoliae como ferramenta para reducir a capacidade reprodutiva de Acacia longifolia.
Desde a Comunidade de Montes da Guarda valoran moi positivamente o resultado da xornada, tanto pola elevada participación como pola diversidade de perfís presentes. A entidade considera que a resposta obtida evidencia a necesidade de impulsar espazos de encontro que permitan compartir coñecemento, experiencias e boas prácticas entre investigación, administración, comunidades de montes e sociedade en xeral.
A Comunidade de Montes Veciñais en Man Común da Guarda agradece expresamente a colaboración do Concello da Guarda, ANABAM e a Asociación Forestal A Jalleira, así como a participación desinteresada de todas as persoas relatoras e asistentes que contribuíron ao éxito desta primeira edición.
Como resultado da xornada, a Comunidade de Montes elaborará un documento técnico coas principais achegas e conclusións dos distintos relatorios e experiencias presentadas, que será remitido as distintas administracións co obxectivo de contribuír á mellora das políticas de prevención, control e restauración dos espazos afectados polas especies exóticas invasoras.
.jpg)
Ningún comentario:
Publicar un comentario