A Casa de Montes de Camposancos abre as súas portas a unha nova edición de “Música e Palabras”
• Será o venres, 5 de xuño, ás 20:00 horas, na súa sede social
Infogauda/Camposancos
A Casa de Montes de Camposancos volverá converterse este venres, 5 de xuño, ás 20:00 horas, nun espazo de encontro para a cultura, a creación e a participación veciñal coa celebración dunha nova edición de “Música e Palabras”, unha iniciativa promovida pola Comunidade de Montes Veciñais en Man Común de Camposancos e a Asociación Cultural Rego de Bicosán. A entrada será libre ata completar a capacidade do local.
A cita, xa consolidada dentro da programación sociocultural impulsada por ambas entidades, propón unha fórmula sinxela e atractiva: un escenario aberto onde as persoas asistentes poden compartir poemas, relatos, cancións, lecturas, composicións propias ou interpretacións musicais, nun ambiente próximo e participativo que ten como principal protagonista a palabra e a expresión artística.
Nun tempo no que a rapidez e a comunicación dixital ocupan boa parte da vida cotiá, “Música e Palabras” reivindica o valor do encontro presencial, da creación compartida e da cultura feita desde a comunidade. A iniciativa pretende ofrecer un espazo onde a veciñanza poida expresar emocións, experiencias e inquietudes a través da literatura e da música, fomentando ao mesmo tempo a convivencia e o intercambio xeracional.
A actividade enmárcase na liña de dinamización cultural que desenvolven ao longo do ano a Comunidade de Montes de Camposancos e a Asociación Rego de Bicosán, entidades que veñen impulsando numerosas propostas destinadas a fortalecer a vida social e cultural da parroquia, convertendo a Casa de Montes nun referente para o encontro veciñal e a promoción da cultura de base.
E como vén sendo habitual, o evento contará coa participación da cantautora María José Baz Martínez, que coa súa guitarra porá o pano musical de fondo ao abano de actuacións que con certeza van ser do agrado do respectable público.
Con esta nova edición, “Música e Palabras” volve convidar a veciños e visitantes a participar activamente nunha velada na que as historias, os versos, as melodías e as emocións compartidas serán os fíos condutores dunha noite que promete estar chea de creatividade, sensibilidade e espírito comunitario.
Ningún comentario:
Publicar un comentario