A GUARDA

O  BNG CONVOCA UNHA ASEMBLEA VECIÑAL SOBRE A COMPRA DA  CASA DE D. ELOI DOMÍNGUEZ 

•  O vindeiro mércores, 13 de maio, ás 19:00 horas, no Auditorio de San Bieito

Infogauda / A Guarda

 O BNG convoca á veciñanza a unha asemblea informativa o vindeiro mércores, 13 de maio, ás 19:00 horas, no Auditorio de San Bieito. O obxectivo é analizar as consecuencias da polémica compra da "Casa de D. Eloi".  

 O portavoz nacionalista, Anxo Lois Baz, denunciou a falta de transparencia do goberno local: “Non sabemos que agocha Carrero ao intentar impoñer unha compra millonaria sen dar conta á veciñanza nin á corporación”. Baz aclarou que os fondos non son un regalo da Deputación, senón cartos do Plan +Provincia que corresponden á Guarda: “Se se gastan nesta casa, perderanse para investimentos fundamentais e urxentes”.  

 Dende o BNG alertan tamén “da falta dun plan de usos e do custo inasumíbel que suporía a rehabilitación e o mantemento do inmoble”. Segundo Baz, esta operación “hipotecaría os recursos futuros da Guarda”, impedindo proxectos prioritarios como a creación de vivenda social ou un auditorio municipal.  

 A formación nacionalista remata facendo un chamamento “á participación masiva” este mércores para frear o que consideran un “despropósito” mentres “as necesidades reais da vila seguen sen atenderse” .