PONTEVEDRA

Máis de 300 persoas arroupan a 5ª edición dos Premios Mulleres FEMUPO 

Nunha gala marcada pola emoción, a sororidade e o compromiso coa igualdade  

Un momento da entrega dos galardóns da 5ª edición dos Premios Mulleres FEMUPO

Raquel Touriño / Pontevedra

 A Federación pola Igualdade das Mulleres da Provincia de Pontevedra (FEMUPO) celebrou este sábado 11 de abril na Finca Batacos (Pontevedra) a 5ª edición dos Premios Mulleres FEMUPO, reunindo a máis de 300 asistentes entre asociacións de mulleres, representantes das administracións públicas, organizacións empresariais, entidades do terceiro sector e numerosas persoas que non quixeron perder unha das citas máis relevantes da provincia en materia de igualdade.  

 A gala desenvolveuse nun ambiente de emoción e recoñecemento colectivo, no que cada momento —desde a recepción ata o peche— estivo marcado pola forza das relacións, os abrazos compartidos e a celebración das traxectorias femininas que deixan pegada no territorio.  

 Dende FEMUPO destacan que “cando as mulleres se recoñecen, se acompañan e se celebran, créase algo inmenso”, nunha noite que puxo en valor esforzos silenciosos, liderados valentes e vidas que constrúen igualdade desde o local.  

 Durante o acto presentouse ademais a canción “Mulleres que iluminan”, creada especialmente para os Premios Mulleres FEMUPO e xa dispoñible en plataformas como Spotify, reforzando a dimensión simbólica e emocional desta edición.  

 A cerimonia seguiu unha programación coidada que incluíu a chegada das premiadas, a intervención institucional de representantes da Xunta de Galicia, Deputación de Pontevedra e ENCE, así como a entrega dos galardóns nas diferentes categorías, acompañada de pezas audiovisuais que permitiron coñecer de preto as historias detrás de cada recoñecemento  

 Nesta edición foron recoñecidas:  

• Montse Betanzos, artesá colareira do Grove, na categoría de Cultura  

• Veteranas do Club de Remo Vila de Cangas, na categoría de Deporte 

• Centro de Información á Muller da Lama, Cerdedo-Cotobade e Fornelos de Montes, na categoría de Administración  

• Raquel Touceda, de Fresas Touceda, na categoría de Empresa  

• Asociación de Mulleres Rurais Albor de Valga, na categoría de Asociacionismo    

 Cada premio puxo en valor historias de vida, compromiso e resiliencia, lembrando que detrás de cada galardón hai unha traxectoria que inspira e transforma.    

 Desde a Federación subliñan que esta gala é o resultado dun traballo sostido no tempo, construído con esforzo, coordinación e compromiso colectivo: “é unha noite feita entre moitas mans e moitos corazóns, que demostra que cando as mulleres se unen, o resultado é poderoso e inesquecible”.  

 A entidade reafirma así a súa mensaxe: seguir xuntas, seguir avanzando e seguir inspirando, consolidando os Premios Mulleres FEMUPO como un espazo de encontro e visibilización do talento feminino na provincia.  

 Os Premios Mulleres FEMUPO 2026 son posibles grazas ao apoio do Plan Social ENCE Pontevedra, que financia este proxecto e permite o desenvolvemento dunha iniciativa de alto impacto social centrada na igualdade, o territorio e as persoas.  

 Así mesmo, FEMUPO quixo agradecer a colaboración de entidades como Vepersa, San Marcos Servicios Funerarios e Magnolia Studio, cuxa implicación contribúe a facer realidade unha gala destas características.  

 Desde a organización destacan que colaborar tamén é construír igualdade e apostar polo cambio, reforzando alianzas que fan posible seguir avanzando.