A GUARDA

Sabor das Rías Baixas ofrece petiscos das festas gastronómicas   

• A gastroneta instalarase de venres a domingo na praza Avelino Vicente  

 

Infogauda / A Guarda 

 Esta fin de semana visitará a vila guardesa a gastroneta da ruta Sabor das Rías Baixas. O vehículo ofrecerá petiscos gratuítos na praza de Avelino Vicente, de venres a domingo, en horario de 11:30 a 14:30h e de 17:00 a 20:00h.  

 Esta gastroneta permite coñecer a oferta das festas gastronómicas das Rías Baixas, promocionando e poñendo en valor a gastronomía pontevedresa. Ademais das degustacións inspiradas nos pratos típicos destes eventos, nas gastronetas repártese material promocional onde se recollen as datas de celebración, os produtos gastronómicos de referencia cunha breve descrición, e mais o lugar exacto onde se celebra cada festa.  

 As festas promovidas son a Festa do Lacón con Grelos (Cuntis), a Festa do Caldo de Mourente (Pontevedra), a Festa Encontro-Degustación do Millo Corvo (Bueu), a Festa da Ostra de Arcade (Soutomaior), a Festa do Requeixo e o Mel (A Neves), a Festa do Choco (Redondela), a Festa do Salmón (A Estrada), a Festa da Troita (Ponte Caldelas), a Festa do Galo de Curral (Vila de Cruces), a Festa da Lagosta e da Cociña Mariñeira (A Guarda), a Festa da Vieira e Festa do Albariño (Cambados), a Feira do Viño do Rosal, a Festa do Carneiro ao Espeto (Moraña), a Romaría da Tortilla de Laro e a Festa da Empanada da Bandeira (Silleda), a Festa do Mexillón e o Berberecho (Vilanova de Arousa), a Festa-Feira do Xamón (A Cañiza), a Festa da Lamprea e a Festa da Lamprea Seca (Arbo), a Festa da Ameixa do Carril (Vilagarcía de Arousa), a Festa da Anguía e Mostra da Caña do País (Valga), a Festa do Viño do Condado do Tea (Salvaterra de Miño), a Festa do Marisco (O Grove) e a Feira do Cocido (Lalín).