DEPORTES

CICLISMO

O Gran Camiño prepara o seu final espectacular na cima do Monte Santa Trega  

•  Poderemos desfrutar desa última etapa, o sábado 18 de abril

O alcalde de A Guarda, Roberto José Álvarez Carrero e o concelleiro Isidro Lomba Lorenzo, no Monte Santa Trega, co director da carreira, Ezequiel Mosquera; o responsable de patrocinios, Fredy Velasco; os exciclistas Álvaro Pino e Óscar Pereiro; e o actor e humorista, David Amor

Foto: C.A.G.

Infogauda / A Guarda

 Membros da organización da quinta edición do evento ciclista O Gran Camiño visitou o Monte Santa Trega, cuxa cima acollerá o final da última etapa desa proba ciclista.  

 O grupo estivo formado polo director da carreira, Ezequiel Mosquera; o responsable de patrocinios, Fredy Velasco; os exciclistas Álvaro Pino e Óscar Pereiro; e o actor e humorista, David Amor.  

 Xunto co alcalde, Roberto José Álvarez Carrero e o concelleiro Isidro Lomba Lorenzo visitaron o percorrido final da etapa As Neves – A Guarda. Deste xeito, puideron ver sobre o terreo a espectacularidade do percorrido, así como as localizacións e necesidades técnicas e loxísticas. 

 A última etapa do Gran Camiño terá un total de 170,5km con 2.682m de desnivel acumulado. O pelotón pasará dúas veces pola Guarda antes de realizar a ascensión final ao Monte Santa Trega.  

 Poderemos desfrutar deste apasionante final o sábado 18 de abril.