A GUARDA

O BNG DENUNCIA IRREGULARIDADES NA XESTIÓN DO ALCALDE DA GUARDA E O SEU GOBERNO  

Anxo Lois Baz (BNG): “En só tres meses hai gastos  por un valor de 662.000 €  que non se axustan a legalidade. Un deles corresponde ao pago por unha entrevista nun medio de comunicación”  

Anxo Lois Baz Vicente, portavoz municipal do BNG no Concello da Guarda

Foto: G.M.BNG

Infogauda / A Guarda

  “A campaña de publicidade permanente do alcalde da Guarda, Roberto [José Álvarez] Carrero, contradise claramente co xeito de proceder na práctica del e do seu goberno”. Así “o evidencia a  denuncia feita polo portavoz municipal do BNG”, Anxo Lois Baz Vicente, que afirma que “nos meses de setembro, outubro e novembro de 2025 hai gastos  por un valor de 662.000€ que non se axustan a legalidade”.  

 O nacionalista indicou “estas irregularidades corresponden a subvencións encubertas, gastos protocolarios sen tramitación, compra de entrevistas a un medio de comunicación ou contratos que non se axustan a lei  tal e como corroboran os informes municipais”.  

 Baz considera que “as prácticas do alcalde da Guarda caracterízanse pola falta de transparencia e de rigor, e en moitas ocasións por  un  desprezo absoluto da  legalidade.   Esta maneira de proceder é a marca de identidade  do Sr. Carrero desde a súa chegada ao goberno.  Lembremos que a día de hoxe, aínda non foi quen de explicar a que bolsos foron parar os cartos recadados no tren turístico contratado irregularmente”.   

 “Desde o BNG non imos tolerar estas maneiras de proceder e denunciarémolas sempre que se produzan, porque danan seriamente o bo funcionamento das institucións” concluíu o portavoz nacionalista.