A GUARDA

‘Contigo no Camiño’ atendeu a máis de 600 peregrinos entre A Guarda e Baiona  

• O programa deu asistencia sociosanitaria durante un mes a través de voluntarios  

Representantes municipais dos Concellos de A Guarda, de Baiona e de Oia, xunto con representantes e voluntarios de Cruz Vermella, diante do Centro Cultural, logo do acto de clausura do programa “Contigo no Camiño”

Foto: C.A. G.

Infogauda / A Guarda 

 Esta mañá pechouse no Centro Cultural de A Guarda o programa “Contigo no Camiño” da Cruz Vermella do Baixo Miño. Con esta iniciativa ofreceron asistencia sociosanitaria ás decenas de peregrinos e peregrinas diarios do Camiño Portugués pola Costa.  

 O concelleiro Isidro Lomba Lorenzo destacou que esta ruta “é xa a terceira en volume, con máis de 85.000 peregrinos no que levamos de 2025”. O presidente de Cruz Roja no Baixo Miño, José María Salcidos González tamén destacou o carácter internacional do camiño, “con xente de Hong Kong ou Australia”. De feito, un 80% dos camiñantes son estranxeiros.  

 A vicepresidenta de Cruz Roja en Galicia, Purificación Serrano Caviedes     afirmou que este “é o camiño máis bonito, onde moitos buscan un sentido espiritual e de renovación de enerxías”.   

 Este programa púxose durante un mes, desde o 24 de setembro, onde quince voluntarios deron asistencia a 622 peregrinos, 80 destas asistencias foron de carácter sanitario. Os voluntarios deron asistencia en diferentes puntos desde A Pasaxe ata Baiona, movéndose en bicicleta e cun vehículo.