VIGO

Luisa Sánchez pon en valor os produtos do mar na presentación da Festa do Marisco de Vigo

A vicepresidenta da Deputación de Pontevedra, Luisa Sánchez, xunto co alcalde de Vigo, Abel Caballero; o presidente da Autoridade Portuaria de Vigo, Carlos Botana; e membros da Asociación de Comercializadores do Peixe e Marisco de Vigo (Acopevi), na presentación da primeira Festa do Marisco de Vigo

Foto: D.PO.

Infogauda / Vigo

 A vicepresidenta da Deputación de Pontevedra, Luisa Sánchez, participou onte martes, no Porto de Vigo, na presentación da primeira Festa do Marisco de Vigo que se celebra desde a pandemia, recuperada pola Asociación de Comercializadores do Peixe e Marisco de Vigo (Acopevi) entre o xoves 4 e o domingo 7 de setembro no barrio do Berbés co apoio da institución provincial. "Aplaudimos os esforzos que estades facendo para facer desta festa un evento moito máis moderno, cómodo e variado, con concertos ou obradoiros infantís", sinalou a vicepresidenta, que puxo en valor as elaboracións que se poderán degustar nesta festa a prezos populares, lembrando que "o noso produto necesita pouco máis porque brilla por si só" e sinalando a necesidade de "poñer en marcha iniciativas que fagan atractivo o seu consumo".  

 Luisa Sánchez asegurou que "en Vigo e na provincia de Pontevedra sabemos ben de que falamos cando falamos de gastronomía porque somos un dos principais destinos de turismo gastronómico da península, somos un lugar onde a xente sabe que vai comer ben e por iso temos un vínculo tan especial coa gastronomía que fai que a Deputación non puidera quedar á marxe desta festa tan singular". Ademais, a vicepresidenta enmarcou este apoio "no noso obxectivo de ser un enlace entre o tecido asociativo e a cidadanía, e no noso afán de diálogo constante cos sectores produtivos da provincia".