VIGO

Luisa Sánchez convida a cidade a gozar do Galicia Fest, o festival que Vigo “pedía e precisaba” 

• A vicepresidenta provincial confesou a súa “aposta persoal” polo evento durante unha visita á montaxe no Peirao de Transatlánticos, que destaca pola súa complexidade

A vicepresidenta da Deputación de Pontevedra, Luisa Sánchez, co director xeral de Turismo, Xosé Manuel Merelles; a delegada territorial, Ana Ortiz; e o xefe de División de Xestión Comercial da Autoridade Portuaria de Vigo, David Castro

Foto: D.PO.

Infogauda / Vigo

 A vicepresidenta da Deputación de Pontevedra, Luisa Sánchez, convidou este mércores a cidade a gozar do Galicia Fest, o festival que Vigo "pedía e precisaba". Durante unha visita á montaxe do evento, no Peirao de Transatlánticos, Luisa Sánchez mostrou a súa ledicia pola estrea deste novo certame musical, que promete ser un "éxito", tal e como se desprende do bo ritmo de venda de entradas. "Imos vivir dous días inesquecibles coa mellor música pop nacional grazas á colaboración amosada pola Deputación de Pontevedra e a Xunta de Galicia", sinalou.  

 A vicepresidenta provincial confesou que o apoio da Deputación ao Galicia Fest parte dunha "aposta persoal" que se marcou para que Vigo puidese gozar dun festival de formato medio no corazón da cidade. "Este é un festival que facía falta, que Vigo pedía e precisaba. Moita xente na cidade está a trasladarnos a súa alegría por poder asistir a un evento musical no centro sen preocuparse de conducir, de facer quilómetros, de acampar… Temos un novo festival ao que se pode chegar andando ou en transporte público, pasar unha tarde e unha noite marabillosas gozando da mellor música pop nacional e volver á casa en cuestión de minutos", apuntou.  

 Igualmente, recoñeceu o "empeño" mostrado neste sentido pola Xunta de Galicia, administración que estivo representada na visita polo director xeral de Turismo, Xosé Manuel Merelles, e pola delegada territorial, Ana Ortiz. Exerceron como anfitrións o xefe de División de Xestión Comercial da Autoridade Portuaria de Vigo, David Castro.  

 Tal e como informou Luisa Sánchez, a montaxe avanza a "bo ritmo" e marcha "segundo o previsto". Neste proceso, que comezou o pasado venres e se prolongará durante unha semana, traballan unha media de 25 persoas ao día para instalar estruturas, valado, servizos eléctricos, camerinos, rigging, equipos de imaxe e son… Así, neste senso, a vicepresidenta provincial salientou a "complexidade" do despregue técnico.  

 Por outra banda, recordou que as entradas de día para o venres están esgotadas e apenas quedan á venda "uns poucos" abonos e localidades de día para o sábado. O cartel está encabezado por Dani Fernández, Mikel Izal, Leire Martínez e Beret. Tamén destacan grupos e artistas como La Habitación Roja, Dorian, Fredi Leis, Sexy Zebras, Maldita Nerea, Marlon, Éxtasis, Samuraï, Hey Kid, Noan e Paula Koops.  

 Galicia Fest é un novo festival de indie-pop que chega con ganas de marcar un antes e un despois no calendario musical de Galicia e do norte de España. O evento, que se desenvolverá nunha localización "privilexiada", nace coa intención de converterse nunha referencia dos certames de formato medio.