SALVATERRA DE MIÑO

A Deputación leva esta fin de semana a Salvaterra de Miño o programa provincial +Música con actuacións de De Ninghures e Os d’Abaixo 

•  As dúas actuacións terán lugar no recinto amurallado á medianoite, De Ninghures o venres 29 de agosto e Os d’Abaixo o sábado 30

De Ninghures

Fotos: Cedidas

Os d'Abaixo

Infogauda / Salvaterra de Miño

 A Deputación de Pontevedra leva esta fin de semana a Salvaterra de Miño unha dobre cita coa música galega da man de De Ninghures e Os d'Abaixo. As bandas actuarán o venres 29 e o sábado 30 de agosto na vila dentro do calendario de +Música, o programa provincial que colabora cos concellos de menos de 50.000 habitantes da provincia para apoiar a súa programación cultural e, con isto, difundir e fomentar a lingua e a cultura galegas. Ambas actuacións terán lugar no recinto amurallado á medianoite do venres ao sábado e do sábado ao domingo).  

 De Ninghures é unha banda do novo folk galego con instrumentos orgánicos e un repertorio tradicional con claras influencias das músicas doutros pobos da península ibérica, América latina ou o Magreb. A formación ofrecerá en Salvaterra de Miño unha experiencia musical auténtica que enraíza a tradición galega cunha perspectiva global, moderna e actual. Pola súa banda, o grupo Os d'Abaixo xorde no ano 2010 co obxectivo de promover e animar bailes e festas tradicionais, cun repertorio que recolle algunhas das pezas populares máis coñecidas da música galega, xunto con novas achegas de fontes tradicionais ou de nova composición.  

 Os concertos de De Ninghures e Os d'Abaixo son dúas das 78 actuacións de +Música que se celebrarán entre os meses de maio e decembro nos 9 concellos de menos de 50.000 habitantes da provincia. Este programa provincial ten un orzamento de 700.000 euros, 100.000 euros máis que na pasada edición, cos que a Deputación aboa os custos de caché dos espectáculos e impulsa a reputación de Pontevedra como un destino cultural de primeiro nivel. A través de +Música, a institución provincial aposta pola descentralización da cultura e a programación de actos culturais de calidade.