O BAIXO MIÑO

O AECT Rio Minho presenta a renovación da Estratexia Rio Minho 2030 

• O encontro reuniu a autoridades dos municipios de ambos lados da Raia 

O director da AECT Rio Minho, José Manuel Vaz Carpinteira, nun momento da súa intervención

Fotos: AECT Río Minho

Ao encontro, asistiron presidentes das cámaras lusas e alcaldes e alcaldesas dos concellos galegos, así como técnicos municipais co fin de revisar a nova Estratexia

Infogauda / O Baixo Miño

 O AECT Rio Minho organizou a xornada “Rio Minho 2030: nova estratexia, novas accións compartidas” co fin de presentar a revisión da Estratexia Rio Minho 2030, recentemente actualizada para adecuarse ao novo cadro europeo 2021-2027. O evento tivo lugar na Escola Superior de Ciencias Empresariais do IPVC, en Valença, o pasado mércores 25 de xuño pola mañá. 

 Ao encontro, asistiron presidentes das cámaras lusas e alcaldes e alcaldesas dos concellos galegos, así como técnicos municipais co fin de revisar a nova Estratexia. Ademais, durante a xornada tamén foi presentada a 8ª convocatoria do POCTEP 2021-27, un programa cuxo obxectivo é o financiamento de proxectos de cooperación transfronteiriza. 

 Durante a xornada fíxose especial fincapé sobre a preocupación polo estado do río Miño, a súa calidade ambiental, a súa gobernanza e o seu futuro. Ademais, afianzouse a idea do río como un recurso fundamental e común do territorio transfronteirizo. 

 A maiores, durante o evento, tiveron lugar diferentes sesións de traballo participativas co fin de traballar sobre os cinco eixos da estratexia: a infraestrutura verde e azul, a gobernanza transfronteiriza, a cultura e a identidade compartidas, a mobilidade sustentable e a economía e o mercado de traballo integrados; sempre desde o punto de vista da importancia do río e afondando nos resultados que xa presenta a propia revisión da Estratexia. 

 Neste senso, a xornada constituíu un lugar de encontro e un impulso conxunto con vista a dar continuidade ao traballo estratéxico compartido no territorio do río Miño. 

 O director da AECT Rio Minho, José Manuel Vaz Carpinteira, asegurou pola súa banda que “queremos que esta sexa unha rexión cada vez máis compartida e máis unida” e aseverou que “buscan conseguir que as barreiras burocráticas entre Portugal e España sexan atenuadas”. 

 Este evento levouse a cabo no ámbito do proxecto REDE_GOV_MINHO, cofinanciado polo Fondo Europeo de Desenvolvemento Rexional (FEDER) a través do POCTEP VI-A 2021-2027.