BAIONA

DÚAS MIRADAS Á ARTE 

EXPOSICIÓN DOS PINTORES CAÍNO E CARLOS PADÍN

• Do 1 ao 15 de agosto de 2024, no multiusos (antigo mercado), de Sabarís 

Ricardo Rodríguez Vicente / Baiona

 Dous pintores - Caíno Vasconcellos e Carlos Padín -, con cadanseu estilo, inspiración e preferencias temáticas, é o que motiva Dos miradas al arte, título xenérico da exposición conxunta que acolle o multiusos (antigo mercado) de Sabarís.

 Esas Dúas miradas á arte amosan arredor dunhas 70 obras pintadas ao óleo sobre lenzo e tamén sobre cartolina.

 Os motivos elexidos por cada artista son os característicos de cada un deles. En todo caso, nas súas respectivas obras está a atmosfera, a luminosidade e a maxia de Baiona e súa contorna. Están tamén esas figuras de antano coas súas facianas e mans que reflicten o esforzo pola subsistencia cotiá. E coma contrapunto, os nenos da Ribeira baionesa coas súas olladas sinxelas.

 Son días de festa e de lecer. Caíno e Carlos Padín souberon captar a ledicia popular da nosa xente, no día do padroeiro da freguesía e nas romarías tradicionais.

 E o carrusel ateigado de rapaces e de mocidade, xirando na noitiña, entre luces de cores e as olladas das nais que agardan polos seus nenos á beira dos cabaliños que brincan no terreiro.

 Dúas miradas á arte é unha boa motivación para achegarnos á obra de dous pintores recoñecidos e con amplos ronseis de exposicións ao longo das súas respectivas traxectorias.

Dos miradas al arte

Do 1 ao 15 de agosto de 2024

No multiusos (antigo mercado) de Sabarís

Horarios: luns, sábados e domingos, de 11:00 a 14 horas.

Tardes: de luns a domingos, de 19:00 a 22:00 horas.