A GUARDA

O Concello de A Guarda e a Comunidade de Montes Veciñais en Man Común  de Camposancos apoian o deporte

Veñen de asinar un convenio coa Sociedade Atlética do Trega  

O alcalde do Concello de A Guarda e membros do equipo de goberno, co presidente e membros da xunta reitora da Comunidade de Montes Veciñais en Man Común de Camposancos; directivos e atletas da Sociedade Atlética do Trega, no Campo de Chans (Camposancos)

Foto: C.A.G.

Infogauda / A Guarda

 O Concello de A Guarda, a Comunidade de Montes Veciñais en Man Común de Camposancos e a Sociedade Atlética do Trega (Tomiño) asinaron un convenio por un ano, para o uso do antigo Campo de Chans, na aba sur do monte Santa Trega, correspondente a devandita comunidade de montes de Camposancos.   

 Deste xeito, A Guarda une vínculos co club no que adestran moitos atletas guardeses/as e fortalece a súa aposta polo deporte. Desde o Concello de A Guarda indican: "Mentres se executan as obras de remodelación do Campo da Mata (O Rosal), o alcalde de A Guarda, Roberto José Álvarez Carrero, ofreceulles esta solución inmediata para non deter a súa preparación."  

 O club de atletismo pensou así en asegurar os adestramentos neste momento circunstancial, mais unha vez rematada a obra, tamén retomarán os adestramentos na Mata.  

 O circuíto atópase no perímetro exterior do campo de fútbol, sendo de terra nun espazo aberto e con vistas ao río Miño. Un lugar perfecto para a preparación da tempada de cross. Ademais, usarán as zonas de duchas e vestiarios, onde disporán de auga e electricidade. Tamén realizarán traballo específico de forza os días chuviosos e de condicións climatolóxicas adversas.  

 Desta maneira, o club ten convenios cos tres concellos: A Guarda, O Rosal e Tomiño, que aportan instalacións intentando facer progresar a todos os atletas, que xa son máis de 120 licenzas no Baixo Miño.   

 Aparte do convenio actual, tamén se falou da posibilidade de realizar nun futuro unha proba de cross.