A Xunta reúnese cos axentes sociais e económicos da Eurorrexión Galicia-Norte de Portugal para avanzar no estatuto do traballador transfronteirizo
• Foi a primeira reunión técnica deste grupo de traballo, que entregará o traballo aos gobernos de España e Portugal antes do próximo Cumio Ibérico do mes de outubro
Infogauda / Vigo
Representantes da Xunta reuníronse hoxe na sede da Agrupación Europea de Cooperación Territorial (AECT) da Eurorrexión Galicia-Norte de Portugal con axentes sociais e económicos para traballar no contido do Estatuto do Traballador Transfronteirizo, co obxectivo de entregarlle o documento aos gobernos de España e de Portugal antes do próximo Cumio Ibérico, previsto para outubro. Deste xeito, o Goberno galego, no marco da Eurorrexión Galicia-Norte de Portugal, avanza xunto a outras institucións do territorio para que o Estatuto do Traballador Transfronteirizo sexa unha realidade para os 15.000 cidadáns que cruzan diariamente a Raia para ir traballar.
No encontro participaron o director xeral de Relacións Exteriores e coa Unión Europea, Jesús Gamallo, ademais de representantes da Consellería de Emprego, Comercio e Emigración, do Instituto do Emprego e Formação Profissional, I.P. Delegação Rexional do Norte, do Consello Sindical Interrexional Galicia-Norte de Portugal, do Eures Transfronteirizo Galicia - Norte de Portugal, da Confederación de Empresarios de Galicia (CEG), e da AECT da Eurorrexión.
O grupo de traballo naceu auspiciado pola Xunta e a Comisión de Coordinación e Desenvolvemento Rexional do Norte (CCDR-N), coa fin de marcar os principais asuntos que deben ser tratados polo Estatuto e propoñer solucións para que esta ferramenta permita avanzar cara a un mercado laboral máis eficiente e cohesionado, en beneficio dos habitantes dos territorios fronteirizos.
Facilitar a circulación e o exercicio dos dereitos
O obxectivo é facilitar a circulación, o acceso á información e o exercicio dos dereitos dos traballadores que residan ou traballen nos territorios fronteirizos de Galicia e do Norte de Portugal, e por extensión, de Portugal e España.
Entre outras cousas, a Xunta considera que o Estatuto debe establecer unha definición común e consensuada da figura do traballador transfronteirizo, que sexa esta a única válida en termos laborais, de fiscalidade e de seguridade social, e establecer o seu ámbito de aplicación, así como a relación laboral entre o empresario e o traballador. Debe tratar tamén os temas relativos ao dereito laboral e condicións de traballo; a fiscalidade; Seguridade Social dos traballadores transfronteirizos; a xubilación e prestacións dos traballadores e as súas familias; as melloras sociais que lles incumban; as cuestións máis “loxísticas” de organización ou os intercambios de información entre os distintos organismos implicados.
Búscase en definitiva que sexa unha “carta dos dereitos e deberes” dos traballadores transfronteirizos para evitar que estes traballadores teñan desvantaxes ou dificultades con respecto aos que traballan no seu país de residencia.
Ningún comentario:
Publicar un comentario