A GUARDA

O BNG DA GUARDA DEMANDA  A CONEXIÓN DA RÚA BAIXO MURO COA RÚA IREIRA

Anxo Lois Baz Vicente, portavoz municipal do BNG, na congostra entre as rúas Baixo Muro e Ireira

Infogauda / A Guarda

 O grupo municipal do BNG no Concello de A Guarda vén de facer público que "demanda a conexión da rúa Baixo Miño coa rúa Ireira." 

 Dese xeito, Anxo Lois Baz Vicente, portavoz municipal do BNG, relembra como está actualmente a situación: "A rúa Baixo Muro discorre ao pé da antiga muralla defensiva da  Guarda. O acceso a esta rúa, só é posible a través dunha escaleira,  que impide o tránsito de persoas con mobilidade reducida e dificulta enormemente a intervención dos servizos de urxencia (ambulancias, bombeiros, Policía Local, etc)  e mesmo a prestación de servizos tan básicos como a recollida de lixo.   

 En maio de 2021 foi aprobado á modificación puntual número 5 do Plan Xeral de Ordenación Municipal do Concello de A Guarda que tiña como finalidade  a conexión da rúa Baixo Muro coa rúa Ireira, para  dar cumprimento ás medidas á que obriga a lei en materia de accesibilidade.  

 Na actualidade, o expediente de expropiación está paralizado, e o Concello acaba de renunciar a unha partida do plan Concellos 22/23 para a execución da obra.  

 Aos problemas de accesibilidade que ten esta rúa,  hai que engadir tamén que non conta con separación de pluviais e fecais o que provoca, pola orografía do terreo, filtracións  nos baixos das vivendas en determinados momentos do ano."  

 Por todos estes motivos, o BNG a través do seu portavoz municipal, Anxo Lois Baz vén de facer público "a presentación dunha moción para que o Concello se comprometa no menor tempo posible a realización desta obra. O compromiso implicaría tamén que se aborden simultaneamente os problemas de saneamento que existen na rúa e procedan á separación de fecais e pluviais en todo o trazado da mesma".