VIGO

O COMITÉ DE EMPRESA DE VITRASA REITERA SÚA TOTAL DISPOSICIÓN A CHEGAR A ACORDOS

Membros do Comité de Empresa de VITRASA nunha mobilización precedente polas rúas da cidade

Foto: FB

Infogauda / Vigo

 O Comité de Empresa de VITRASA, concesionaria do servizo de transporte público na cidade de Vigo, fixo pública á seguinte nota:

 Dende o Comité de Empresa de Viguesa de Transportes S.L., e ante a nova convocatoria de reunión para a negociación de convenio colectivo realizada no día de hoxe pola dirección de empresa, queremos manifestar o seguinte:  

 O colectivo de traballadores e traballadoras de Vitrasa somos o máis afectado polo actual estado de folga e é por iso que non temos maior interese por alongar unha situación na que somos os maiores prexudicados/as.  

 En todo momento a intención deste Comité de Empresa foi a de desbloquear o conflito; é por iso que a pesar de non chegar a entendemento en anteriores reunións realizamos unha revisión da plataforma inicial de convenio e entregámoslla á empresa coa intención de que fose valorada co obxectivo de sentarnos a negociar o máis axiña posible.  

 Con todo, xa desde a primeira reunión solicitámoslle á empresa unha documentación imprescindible para poder valorar e realizar posibles ofertas no marco da negociación. Confiamos en que a pesar de non realizarse a entrega desta documentación por parte da empresa, a disposición para negociar da dirección de Vitrasa (situación que vimos demandando dende hai tempo) será positiva e dita documentación nos sexa entregada antes da reunión de convenio do próximo xoves. En caso contrario atoparémonos novamente cunha reunión baleira de contido e na que chegar a acordos resultará practicamente imposible.  

 Reiteramos pois a nosa total disposición a chegar a acordos para darlle unha pronta solución ao conflito.

 Vigo, 2 de xaneiro de 2024