O ROSAL

Equipos do Baixo Miño, premiados no Campionato Nacional de Futbolín  

• Dezaseis xogadores e xogadoras participaron en Lalín nunha das competicións máis importantes do panorama futbolineiro 

  

Participantes do Baixo Miño coa bandeira do Rosal no Campionato de España 2023

Foto: C.O.R.

Infogauda / O Rosal  

 Grandes sensacións tras a participación de oito equipos e dezaseis xogadoras e xogadores do Baixo Miño no XXVI Campionato Nacional de Futbolín Presas EVO 2023 que se celebrou no multiusos Lalín Arena. 

 Por terceiro ano consecutivo Lalín convertíase na capital de España do futbolín e acollía a máis de 300 equipos, 165 na modalidade movemento, 140 en parado e unha decena de conxuntos femininos. 

 Os oito equipos do Baixo Miño, que disputan en Editorial Tamuxe a Liga Nacional de Futbolín do Rosal, participaron na súa maioría na modalidade de parado neste torneo, un dos máis prestixiosos do circuíto futbolineiro actual, conseguindo varios xogadores e xogadoras do Rosal e da Guarda diferentes premios. 

 Diego Mariño e Sergio Casal, Yeya, foron os mellores clasificados da zona neste campionato nacional, cun oitavo posto en C-2. Pola súa banda, Nacho Conde e Jorge Lorenzo remataron nun merecidísimo quinto lugar en C-3, e Sergio Rodríguez, Trinta, e Sergio Martínez, Demo, acadaron o sétimo posto, tamén en C-3. 

 Os dezaseis xogadores e xogadoras do Baixo Miño resaltan a fantástica experiencia vivida en Lalín, prometendo seguir adestrando e xogando a Liga Nacional de Futbolín para presentarse a vindeiros campionatos. 

 Por outro lado, a pasada fin de semana celebrouse en Silleda un torneo oficial de futbolín durante a III edición do Motor Show Galicia 2023, no que Diego Mariño e Sergio Casal, Yeya, volveron traer boas novas para a comarca ao rematar subcampións da Segunda División na modalidade movemento, sen parar a bola dianteira.