VIGO

O TSXG corrixe a operativa de servizos mínimos do Concello de Vigo nos paros parciais en Vitrasa 

• A decisión é un novo revés para o Goberno local por infrinxir o dereito de folga no marco do conflito da concesionaria co seu persoal polo convenio  

O Concello de Vigo volve  quedar en evidencia unha vez máis no marco do conflito que a concesionaria do transporte urbano mantén co cadro de persoal a conta do convenio colectivo

Foto: CIG

Infogauda / Vigo

 O Concello de Vigo volve  quedar en evidencia unha vez máis no marco do conflito que a concesionaria do transporte urbano mantén co cadro de persoal a conta do convenio colectivo. Nesta ocasión despois de que o Tribunal Superior de Xustiza de Galicia (TSXG) veña de concluír que os decretos de servizos mínimos fixados durante os paros parciais conculcan o dereito de folga. 

 Segundo explican dende o comité de empresa de Vitrasa, os decretos de servizos mínimos, ademais establecer unha porcentaxe de vehículos que deben de saír obrigatoriamente á rúa, establecen que os autobuses que xa estean circulando no momento no que se inician os paros teñen que continuar recollendo viaxeiros/as até media hora despois do comezo dos paros. 

 Para a representación sindical esta disposición do Concello “atenta claramente” contra o dereito de folga, “posto que a pesares de xa ter asignado un número de servizos mínimos, durante a primeira media hora dos paros parciais o número de vehículos que traballan é moi superior á porcentaxe indicada”. 

 A reclamación do comité fora estimada parcialmente polo Xulgado do Contencioso Administrativo número 1 de Vigo, pero  agora o TSXG vén de anular esa sentenza,  dándolle a razón o comité de empresa e estimando a súa reclamación inicial.