VIGO

A CIG convoca unha protesta diante da Cidade da Xustiza de Vigo para rexeitar o novo concurso de seguridade privada 

Os pregos de condicións non contemplan unha dotación económica suficiente para cubrir os gastos do persoal que vai ser subrogado 

Cidade da Xustiza, de Vigo

Foto: CIG

Infogauda / Vigo

 A CIG-Servizos desenvolverá unha mobilización diante da Cidade da Xustiza de Vigo o vindeiro luns 18 de setembro de 10:30 a 12:00 horas para rexeitar o novo concurso de adxudicación do servizo de vixilancia e seguridade nos edificios xudiciais de Galiza. Dende a central levan tempo denunciando que os pregos de condicións non contemplan unha dotación económica suficiente para cubrir os gastos salariais do persoal que vai ser subrogado e que o concurso non dá resposta ás necesidades de vixilancia e seguridade das instalacións.  

 O responsábel nacional de seguridade privada da CIG, Pedro Pérez, lembra que o proceso estivo che deficiencias dende o principio, até o punto de que a Xunta tivo que desistir do anterior concurso tras as alegacións presentadas pola central sindical reclamando que se corrixisen as anomalías detectadas nos lotes 1 (edificios xudiciais da Coruña) e 12 (Cidade da Xustiza e rexistro civil de Vigo).  

 Mais os pregos de condicións deste último lote volveron contemplar unha partida económica insu-ficiente para afrontar os gastos do persoal que vai ser subrogado, xa que figuran 11 persoas traba-lladoras para cubrir 10 xornadas. Cando no concurso só se contemplan sete xornadas a contratar, coa correspondente partida económica para esta cantidade de persoal. 

 Por iso Pérez instara a Consellaría de Presidencia, Xustiza e Deportes “a ter en conta a realidade da Cidade da Xustiza de Vigo, na que se fixo investimento millonario nun edificio con 19 andares, cun edificio anexo de catro andares e cun aparcadoiro de tres sotos, e se atendan as necesidades reais para a realización dun servizo de seguridade e vixilancia verdadeiramente efectivo”. Pero o depar-tamento autonómico seguiu adiante co concurso, que debe de estar a piques de se resolver, tendo en conta que a apertura de plicas tivo lugar o pasado xoves día 7. 

 De xeito que o servizo contemplará recortes nas quendas de tarde, de noite e de fin de semana a 24 horas, “xa que non se subsanaron as deficiencias para dar a cobertura adecuada e para unha efectiva prestación do servizo de seguridade e vixilancia para os bens e as persoas”. 

Non figura o persoal con dereito a subrogación 

 Neste senso, considera que o convenio coas forzas e corpos de seguridade do Estado presentes no edificio non vai dar cobertura ás necesidades de vixilancia e seguridade necesarias para estas instalacións, non realizándose tampouco o control de persoas, paquetería e accesos, tanto a persoal como a persoas usuarias. 

 E lamenta que a modificación que se levou a cabo no concurso tan só supuxo engadir un lote 13, correspondente ao edificio xudicial de Lalín, que non figuraba no anterior, “mais non se deu respos-ta á problemática do lote 12”. 

 En canto ao lote 1, correspondente aos edificios xudiciais da Coruña, critica que seguisen sen figurar todas as persoas traballadoras que teñen dereito de subrogación e que contemple unha partida económica insuficiente para o custe do servizo.