OIA

5ª xeira de verán 2023. A Valga    

ESTE XOVES DÍA 20 XEIRA POLOS MONTES DA VALGA  

IEM / Oia

 O IEM continúa co seu programa de xeiras do verán con un paseo polos montes da Valga, na Serra da Groba.  

 A partires das 18.30 h, comezando na Casa Forestal de Valdarca, da Comunidade de Montes de Oia, faremos un pequeno repaso polo grande patrimonio natural e cultural das chans da Valga. A hidroloxía, con fontes, regos, regueiras e ríos e a vexetación de turbeira con valores tan importantes como as orballiñas, as prantas carnívoras da serra, os sphangums e brións que agochan insectos e ras de san Antón, píntigas rabilongas, tritóns e demais fauna vertebrada e invertebrada deste ecosistema en perigo pola presión do home. Os garranos ou burras do monte, e multitude de aves que viven arredor dos queirogais húmidos e secos que podemos ver nun paseo demorado, con rico patrimonio etnográfico, como o Curro da Valga, e arqueolóxico con mámoas, petróglifos e marcos de termo. E a fermosa paisaxe das chans da Valga e o horizonte miñoto e mariño, co pai Miño e o  atlántico.  

Xoves día 20 de xullo. Punto de encontro: Casa Forestal de Valdarca da Comunidade de Montes de Oia.  

https://goo.gl/maps/S1MhNSoid6cv25QKA  

 Dificultade media. Traer roupa e calzado axeitado (hai que camiñar nalgúns tramos por monte baixo). Auga e protector solar. Duración aprox.: 2,30 h.