A GUARDA

PRESENTACIÓN DA CANDIDATURA DO PARTIDO POPULAR Á ALCALDÍA DA GUARDA, CON ALFONSO RUEDA E ROBERTO JOSÉ ÁLVAREZ CARRERO   

 

 Infogauda / A Guarda

 O vindeiro xoves día 18, ás 21:00 h, no Hotel El Molino (Praia de Camposancos - A Guarda), o Partido Popular de A Guarda presentará oficialmente, da man de Alfonso Rueda Valenzuela, a candidatura completa á alcaldía de A Guarda con Roberto José Álvarez Carrero á cabeza. 

 “Expoñeranse as liñas básicas do programa co que os populares esperan recuperar o goberno local”, indicaron desde o Partido Popular.

 Segundo palabras de Roberto José Álvarez Carrero: “Trátase do único proxecto serio, real e efectivo para un cambio de rumbo na Guarda fronte as fotografías e inacción do PSOE de Antonio Lomba e a crítica sen sentido e covardía do seu socio de goberno, o BNG de Anxo Baz. É un proxecto centrado nos intereses e actuacións prioritarias para os veciños e veciñas da Guarda. O noso pobo ten futuro se hai un cambio real de goberno. Ese cambio só o poden encabezar o noso equipo”. 

 Roberto José Álvarez Carrero e o Partido Popular da Guarda convidan “a todos os cidadáns, con independencia das súas ideas e adscrición política, a participar nesta presentación oficial”. 

 Salvo imprevistos, no acto de presentación da candidatura, ademais de Alfonso Rueda Valenzuela e Roberto José Álvarez Carrero, intervirá Luis López Diéguez “Lugués”, presidente provincial do PP de Pontevedra. 

 Ao termo da presentación servirán un viño español.