SANTIAGO DE COMPOSTELA

Do 4 ao 30 de abril

O MUSEO  DO POBO GALEGO ACOLLE 

A instalación participativa "Cartografías téxtiles"

• Proxecto Cartografías Téxtiles: organizado por APECV (Portugal). 

• Coordinadoras do proxecto en Santiago de Compostela: María Jesús Agra, Cristina Trigo. 

• Coa colaboración do Museo do Pobo Galego e a Facultade de Ciencias da Educación (USC).  

 

 Museo do Pobo Galego / Santiago de Compostela

 Cartografías Téxtiles é un proxecto internacional de investigación-acción participativa que procura promover o estudo e o facer artístico con materiais e técnicas textís como o bordado (ou calquera outra) que se empregan aquí como elementos que favorecen a cohesión social, o activismo medioambiental e a relación coa identidade e o patrimonio.   

 O tema que propoñemos aquí é: “Dálle voz ao lugar” mediante o que convidamos a participar cosendo, bordando, debuxando... as vosas historias sobre as teas de xeito que con todos os cadrados vaiamos construíndo unha cartografía colectiva que amose a diversidade de voces e narrativas téxtiles e funcione como un chamamento colectivo contra os conflitos sociais e ambientais e polo futuro dos lugares e xa que logo, do planeta.  

 No Museo do Pobo Galego estará nas súas salas en forma de instalación participativa do 4 ao 30 de Abril. Se queredes formar parte e contribuir con algunha peza, podedes descargar as instruccións para participar premendo eiquí.  

 Cartografías  Téxtiles  é  un  proxecto  internacional  organizado  polo  Grupo  de  Investigación  da  Associação  de  Professores  de  Expressão  e  Comunicação  Visual  de  Portugal  (APECV)  que  pretende  dar  voz  às  comunidades  e  aos  lugares  a  través  de  narrativas  e  técnicas  téxtiles  como  o  bordado,  entre  outras.       

 Tomando  como  eixo  temático  o  obxectivo  16  de  Desenvolvemento  Sostible  da  axenda  2030  das  Nacións  Unidas  que  chama  a  promover  sociedades  xustas,  pacíficas  e  inclusivas,  os  coordinadores  e  coordinadoras  do  proxecto  nos  diferentes  países  procuran  colaboracións  e  convidan  á  cidadanía  a  participar  na  creación  dun  inmenso  mosaico  de  tea  a  través  do  que  facer  un  chamamento  polo  futuro  do  planeta,  comezando  polos  lugares  que  conforman  as  nosas  identidades,  e  contra  os  conflitos  sociais  e  ambientais.       

 As  persoas  que  participan  cosendo  a  súa  propia  peza  poden  experimentar  a  cadencia  contemplativa  do  bordado  ou  o  tecido  como  proceso  simbólico  de  activismo  porque  mediante  este  acto  individual  ou  colectivo  baseado  en  coser,  bordar,  unir  pezas  de  tea  nun  cadrado  de  lenzo  de  10cm  x  10cm,  reflexionamos  sobre  a  relación  ca  contorna  ao  tempo  que  damos  visibilidade  ao  téxtil,  parte  esencial  da  sociedade,  do  patrimonio  e,  en  particular,  da  historia  invisible  das  mulleres.      

 O  medio  ambiente  necesítanos  e  precisamos  explorar  e  imaxinar  outros  xeitos  de  ser,  estar  e  vivir.  Peza  a  peza  vaise  creando  un  inmenso  mosaico  -a  modo  de  cartografía-  que  invita  a  pararse  polos  diferentes  lugares,  ollares   e  xeitos  de  facer  e  contar  historias.    Cada  cadrado  convértese  así  nunha  acción  de  resistencia,  de  poética,  de  liberdade  e  experimentación.       

 Como  consecuencia  a  autoría  individual  esváese  e  ponse  o  foco  no  colectivo.  Precisamente  para  facilitar  a  participación  e  a  libre  circulación  das  creacións  a  través  do  correo  postal,  as  teas  teñen  esas  medidas.  As  pezas  elaboradas  pasan  a  formar  parte  do  proxecto  e  van  indo  de  mans  en  mans,  deixando  a  súa  pegada  noutro  lugar  e  uníndose  a  outras  cartografías.   

María  Jesús  Agra,  Cristina  Trigo    

Coordinación do proxecto en Santiago de Compostela e do colectivo C3