A GUARDA

O BNG REXEITA A IMPLANTACIÓN DA EÓLICA MARIÑA A MENOS DE 30 KM DA COSTA DE A GUARDA  

Anxo Lois Baz Vicente (concelleiro portavoz do Grupo Municipal do BNG no Concello de A Guarda): “Non podemos consentir que as eléctricas se carguen  a frota pesqueira e provoquen unha agresión  ecolóxica  e paisaxística  de grandes dimensións nunha zona onde o turismo é un sector económico relevante”  

Parque eólico marítimo

Foto: BNG

Infogauda / A Guarda

 O BNG leva a pleno este venres “o rexeitamento da instalación da eólica mariña a menos de 30 km de A Guarda”.  

 Os nacionalistas argumentan  que “a eólica mariña e a defensa do sector pesqueiro non son compatíbeis, como se acreditou en Viana do Castelo, onde os mariñeiros denuncian que a zona quedou, literalmente, sen peixe, ou como se está demostrando co  replantexamento que Noruega está a facer da eólica mariña pola grande afectación que está a ter sobre a súa pesca”.  

 “Somos plenamente conscientes da necesaria transición ecolóxica - afirman desde o BNG - pero ten que ser xusta e non a conta  de destruír o medio ambiente e os recursos dos que vivimos”.  

 “Galiza duplica na actualidade os obxectivos marcados pola Unión Europa en produción de enerxías renovábeis para o 2030 e agora a maiores  preténdese instalar no noso país o 43% da eólica mariña prevista para todo o Estado Español.  Trátase de que as grandes eléctricas sigan facendo caixa cos nosos recursos deixando sen medio de vida á xente do mar”, denuncian os nacionalistas.   

 Anxo Lois Baz Vicente, portavoz municipal do BNG na Guarda afirmou: “Pretenden colocarlle a etiqueta de verde ao que simplemente é un proceso de espolio e colonización enerxética. Non podemos consentir que  as eléctricas se carguen  a frota pesqueira  ademais de  provocar unha agresión  ecolóxica  e paisaxística  de grandes dimensións nunha zona onde o turismo é un sector económico relevante”.